Saturday, 30 March 2013

நாடகம் பார்க்கலாம் வாங்க..!

          நாடாளுமன்ற தேர்தல் வரும் சூழ்நிலை ஏற்படும்போது வழக்கமாக பேசப்படும்  விஷயம்,அரசியல் கட்சித் தலைவர்கள் நடத்தும் நாடகங்களில் ஒன்று , தேசிய அளவில் மூன்றாவது அணியை அமைக்கும் விஷயம்தான் !

            பகிரங்கமாக தன்னை மதவாத கட்சிதான் என்று பி.ஜெ .பி தனது சொல்லாலும்,செயலாலும் பிரகடனப்படுத்தி வருகிறது! அதன் காரணமாக,  அக்கட்சிக்கு இந்து மதவாத சிந்தனை உள்ள,   ஆர்.எஸ்.எஸ்., இந்து முன்னணி, போன்ற பலஅமைப்புகள் தேர்தலில் பி.ஜே.பி கட்சியை ஆதரிக்கவும் வாக்களிக்கவும் தயாராக உள்ளன! சிவசேனா போன்ற கட்சிகளும் பாரதிய ஜனதா கட்சியை ஆதரித்தும்,சார்ந்தும் தேர்தலுக்கு முன்பும்,தேர்தல் நடந்து முடிந்த பின்பும் இருந்து வருகின்றன!

          மற்றொருபுறம்  காங்கிரஸ் கட்சி ஒரு அணியாக  நின்று நாடாளுமன்றத் தேர்தலை சந்தித்து வருவது கடந்த காலத்தில் நடைமுறையாக இருந்து வருகிறது!  காங்கிரஸ் கட்சிக்கு  மதசார்பின்மை முகமூடி கைகொடுப்பதால் அக்கட்சி  முஸ்லிம் கட்சிகள், சிறுபான்மையினர் கட்சிகள்,அமைப்புகளை  தனது அணியில் இணைத்து தேர்தலை சந்தித்து வருகிறது!

           பாரதிய ஜனதா கட்சி, காங்கிரஸ் கட்சி ஆகிய இரு அணிகளை தவிர்த்து அமைக்க விரும்பும்  மூன்றாவது அணி முயற்சியில்  எப்போதும்  மார்க்சிஸ்ட் கட்சியும்  மற்றொரு பிரிவான இந்தியகம்யுனிஸ்ட் கட்சியும் ஆர்வமாக இருந்துவருகின்றன!

        இந்த இரு கம்யுனிஸ்ட் கட்சிகளைப்போலவே  காங்கிரசால்  பாதிக்கப் பட்ட, அல்லது காங்கிரசை அப்புறப்படுத்த விரும்பும்  சில கட்சியின் தலைவர்கள்  தேர்தல்தோறும், மூன்றாவது அணி முயற்சியை
கையில் எடுக்கத் தவறுவதில்லை! முலாயம் சிங் யாதவ் இப்போது கையில் எடுத்துள்ளார்!
 
          இத்தகைய கட்சிகள்  பகிரங்கமாக  காங்கிரசை எப்போதும் எதிர்த்து, காங்கிரசின் தவறுகளை, ஊழல்,முறைகேடுகளை நாட்டு மக்களுக்கு சொல்லி, மக்களிடம் விழிப்புணர்வை ஏற்படுத்திய கட்சிகள் இல்லை! காங்கிரஸ் கட்சி மீது  அதிருப்தி ஏற்படும்போதும்,  நம்பிக்கை இல்லா தீர்மானம்  பாராளுமன்ற அவைகளில் வரும்போதும்   நட்டு நலனை உத்தேசித்து  வாக்களித்த கட்சிகளும் இல்லை!

          அதுபோலவே,  பாரதிய ஜனதா கட்சியின் மதவெறி, வகுப்பு வாதம், இனவெறி, சாத்திய ஒடுக்குமுறைகள் போன்ற  முட்டாள்தனமான செயல்களைக்   கண்டித்தும், போராடியும்,  நாட்டு மக்களுக்கு விழிப்புணர்வை  ஏற்படுத்திய கட்சிகளும்,அதுபோன்ற தலைவர்களும் இல்லை!

      சுருக்கமாக சொன்னால்,  மூன்றாவது அணி அமைக்க விரும்பும் தலைவர்களும்  அவர்களது கட்சிகளும், கடந்த காலத்தில் காங்கிரஸ் ,பி.ஜே.பி  ஆகிய  இரண்டு கட்சிகள் செய்ததையும்,  இந்த இரண்டு கட்சிகளை ஆதரித்தும் தங்களை வளர்த்துக் கொண்டவர்கள்தான்! இந்த இரண்டு கட்சிகள் மூலம் ஆதாயம் பெற்றவைதான்!  அவ்வாறான  நிலையில் ,இந்த கட்சிகள் மூன்றாவது  அணி அமைப்பது குறித்து  தேர்தல் தோறும் பேசுவதும், மூன்றாவது அணி அமைக்க முயல்வதற்கும்  காரணம் என்ன?

          உண்மையில் தேசத்தை காப்பாற்றவும், நாட்டு மக்களின்  நலனை கருதியும்  இல்லை என்று உறுதியாக சொல்லலாம்!

          பிறகு எதற்கு இந்த முயற்சி என்றால்,  தேர்தல் சமயத்தில் தங்களது கட்சிக்கு  அதிக சீட்டுகளும், தேர்தல் செலவுக்கு  கணிசமான பணத்தை இரண்டு அணிகளிடம் பெருவதர்க்கும்தான்!  அதுமட்டும் இன்றி, தங்களது பதவி ஆசையை, பதவி பித்தை  காட்டி,ஆட்சி அமைக்கும்  அணியிடம் தொடர்ந்து ஆதாயம் அடைவதற்கும் இந்த மூன்றாவது ஆணை பேச்சும்,நாடகமும் சில கட்சிகளுக்கும்,தலைவர்களுக்கும்  தேவைபடுகிறது!

      'அத்தைக்கு மீசை முளைத்தாலும்', 'கறந்த பால் மடி புகுந்தாலும்', 'கருவாடு மீண்டும்  துள்ளி குதித்தாலும்'   கூட..   இந்திய அரசியலில் மூன்றாவது அணி ஏற்படுவதும், அது  மக்களின் மதிப்பைப் பெறுவதும், ஆட்சியில் அமர்வதும் என்பது  நடக்கவே நடக்காத  காரியம்  என்று சொல்லலாம்!

 

Thursday, 21 March 2013

குரங்குகள் நடத்தும் ஆட்சி!

        ஆங்கிலேயரிடம் மனுகொடுப்பதை மட்டுமே செய்துவந்த காங்கிரசை ஒரு மாபெரும் மக்கள் இயக்கமாக ஆக்கிய பெருமை காந்திக்கு உண்டு! சத்தியாகிரகம்,என்பதையும் உண்ணா விரதத்தையும்  ஆங்கிலேயருக்கு எதிரான போர் கருவியாக பயன்படுத்தி அதில் வெற்றியும் கண்டவர் காந்தி!

         அவர்  கண்ட கனவுகளில் மற்றொன்று, ராம ராஜ்ஜியம்!. ராமராமரஜ்ஜியத்தில்  மக்கள் அனைவரும் மகிழ்ச்சியாக வாழ்ந்ததாகவும் மக்களின் குறைகளைக் களைந்து ,மக்களின் தேவைகளை அறிந்து ஆட்சி செய்ததாகவும்  கதை சொல்வார்கள்! உண்மையில் அப்படி நடந்ததா என்பது வேறுவிஷயம்! நடந்திருந்தால் ராம ராஜ்ஜியம்  என்பது இன்றைய இந்திய ஜனநாயக ஆட்சியை விட உயர்ந்தது என்று உறுதியாக சொல்லலாம்!

          இன்றைய ஜனநாயக ஆட்சிக்கு  இந்தியாவின் சுதந்திரமும்,அதனை  அடைய போராடிய  சுதந்திர போராட்ட வீரர்களும் அவர்களை வழிநடத்திய, காந்தியும் முக்கிய,அடிப்படையான காரணங்கள் என்று சொல்லலாம்!  

         காந்தியால் சுதந்திரம் அடைந்த இந்தியாவில் அவரது உண்ணாவிரதபோராட்ட முறையும், அகிம்சையும் இன்று மதிப்பிழந்து விட்டன. அகிம்சை வழியில் போராடும் ஜனநாயகவாதிகளை  ஆட்சியாளர்கள் படுத்தும் பாடு  சொல்லிமாளது.!

        அதுவும் காந்தி  சார்ந்து இருந்த  காங்கிரஸ் கட்சியும்,அக்கட்சியின் ஆட்சியும்  ஜனநாயக வழியில் உரிமைக்காக போராடுபவர்களை   கையாளும் விதமானது,  சர்வாதிகாரத்தின் பிரதிபலிப்பாக இருப்பது வெட்கப்படவேண்டிய  வேதனையாகும்!

       போகட்டும்  விசயத்துக்கு வருவோம்! 

         தமிழகமே திரண்டு  இலங்கைக்கு எதிராக  அறப்போராட்டங்கள் நடத்திக்கொண்டு  இருந்தபோது,ஆட்சியில் இருக்கும் காங்கிரசின் செயல்பாடுகள்  கண்டிக்கத்தக்கவையாக இருந்தன. ஐ.நா. சபையில் அமெரிகாவின் தீர்மானத்தை  நீர்த்துப் போக செய்யும் விதமாக நடந்து கொண்டது! இலங்கை அரசை இந்தியா பாராட்டியது!

      பிறகு தி.மு.க கட்சி ஆதரவை  வாபஸ் பெறுவோம்  என்றபோதும்  அதனை பொருட்டாக எடுத்துக் கொள்ளாமல்,அலட்சியபடுத்தி  வந்தது! ஆட்சி விலகல்  என அறிவிப்பை தி.மு.க வெளியிட்ட பிறகு,அமெரிகாவின் தீர்மானம்  இறுதி செய்த பிறகு,இந்தியா தீர்மானத்தை ஆதரிப்பதாக சொன்னதும், வாக்களித்து இருப்பதும் தமிழர்களை தொடர்ந்து  ஏமாற்றி வருவதை காட்டுகிறது!

    காலம் கடந்து கொண்டுவரும் திருத்தத்தை    எப்படியும் ஏற்க மாட்டார்கள் என்பதை உறுதியாக தெரிந்து கொண்டு,தமிழர்களை ஏமாற்றவும், இலங்கையை  தொடர்ந்து காப்பாற்றவும் இந்தியா மேற்கொண்டதந்திரத்தை    தமிழர்கள் புரிந்துகொண்ட உள்ளனர்.

           ஐ.நாவில் நிறைவேறியுள்ள தீர்மானத்தை வைத்து, ராஜபட்சேவை, இலங்கை அரசை அமெரிக்கா  மிரட்டவும், ஆதாயம் பெறவும் இந்த தீர்மானம்  பயன்படுமே தவிர, பாதிக்கப்பட்டுள்ள தமிழினத்துக்கு எள்ளளவும் தீர்மானத்தை நிறைவேற்றியது பயன்படப்போவதில்லை என்பது உண்மை நிலையாகும் !

       இந்த உண்மையானது ,இந்தியாவுக்கும் அதன் ஆட்சியாளர்களுக்கும்  தெரிந்து உள்ளதுபோல,   இலங்கைக்கும்  தெரிந்திருகிறது!  இலங்கைக்கு தெரிந்து இருப்பதால்தான்  தினம் தினம்  தமிழ் மீனவர்கள்  இலங்கை படையினரால்  தாக்கப்படும் சம்பவங்கள் நடந்து வருகின்றன!

        என்ன செய்வது ?   ராம ராஜ்யத்தில் அன்று சீதை சுகப்படவில்லை! துயரப்பட்டாள்!!  ஜனக மன்னனின் மகளாக்கப் பிறந்தும்,மன்னனான அயோத்தி   ராமனை மணந்தும்  சீதை துன்பப்பட்டாள், கண்ணீர் விட்டாள்,ராவணனால் கடத்தப்பட்டாள் , அசோக வனத்தில் அவஸ்தைப் பட்டாள்!  ராமனால் மீட்கப்பட்ட பிறகும்  அக்கினிக்கு  ஆட்பட்டாள் ,ராமனின்  சந்தேகத்தால் காட்டுக்கு சென்று மீண்டும் கலங்கி அழுதாள் !
 
         ராம ராஜ்ஜியத்தில் சீதைக்கு நேர்ந்ததைப்போல இன்று ராவணன் ஆண்ட இலங்கையில்,தமிழ் சீதைகள் நிலை உள்ளது! தமிழர்களின் நிலை உள்ளது!

         ராவணனைவிட கொடிய அரக்கனான ராஜபட்சேவால்  தமிழர்கள் கொல்லப்படுகின்றனர்! குற்றுயிர் ஆக்கப் படுகின்றனர்! காப்பாற்றவேண்டிய, வாழ்வளிக்க வேண்டிய  ராமனைப் போன்ற இந்திய ஆட்சியாளர்களாலும் , தமிழர்கள்  தொடர்ந்து இன்னலுக்கு ஆளாகி வருகின்றன!

         இவற்றை எல்லாம் பார்க்கும் பொது,இன்று இந்தியாவில் நடக்கும் ஆட்சியானது  ராமராஜ்ஜியம் போலதான் இருக்கிறது! ஆனால், இன்று  ராமனின் சார்பாக இன்று குரங்குகள்  ஆட்சிநடத்துகின்றன!

          அதனால்தான் ,  தமிழர்கள் துயரம்  மட்டும் சீதையின் துயரங்களைப் போல மேலும்மேலும் தொடருகிறது!



   

Tuesday, 19 March 2013

ஒரு முடிவுக்குப் பின்னால் உள்ளவை!

     தி.மு.க. மத்திய அரசுக்கு கொடுத்து வரும் ஆதரவை விளக்கிக் கொள்வதாக அறிவித்து உள்ளது.! அக்கட்சியைத் தொடர்ந்து  விடுதலைச் சிறுத்தைகள் கட்சியும் கூட்டணியில் இருந்து விலகுவதாக அறிவித்து உள்ளது.

       இவ்விரு கட்சிகள் எடுத்துள்ள  இம்முடிவு, இலங்கையில் நடந்த இனப்படுகொலை குறித்த இந்திய அரசின் பார்வையில் சற்று மாற்றத்தை ஏற்படுத்தும்  என எதிர்பார்க்கலாம் ! ஐ.நா.சபையில் இலங்கைக்கு எதிரான தீர்மானத்தை ஆதரிக்கும் நிர்பந்தத்தை இந்தியாவுக்கு  இக்கட்சிகளின் விலகல் முடிவு ஏற்படுத்தி இருக்கிறது என்பதை மறுப்பதற்கு இல்லை!

       இந்த முடிவை தி.மு.க.கட்சியின் தலைவர் கருணாநிதி  காலம் கடந்து எடுத்திருக்கிறார்!  இலங்கையில்  உச்ச கட்டப்போர் நடைபெறும் பொது,  40 நாடாளுமன்ற உறுபினர்கள் இருந்த நிலையில்  எடுத்திருந்தால், ஈழத் தமிழர்கள் பல்லாயிரக் கணக்கானோர்  படுகொலையாவது தடுக்கப்பட்டு இருக்க வாய்ப்பு  ஏற்பட்டிருக்கும்! இலங்கை விஷயத்தில் இந்தியாவின் அணுகுமுறையில் நிச்சயம் மாற்றம் நிகழ்ந்து இருக்கும்!  கண்கெட்ட பிறகு சூரிய நமஸ்காரம் செய்யும் நிலை தி.மு.க-வுக்கு ஏற்பட்டு இருக்காது!

       போகட்டும்  தி.மு.க  கூட்டணியில் இருந்து விலகியதும் இந்தியாவின் இலங்கை பாசம் குறைந்துவிடும் என்று சொல்ல முடியாது! இத்தாலியர்கள் இரண்டு மீனவர்களைக்  கொன்றதை கடுமையான  குற்ற நிகழ்வாகப்  பார்க்கும் அரசு  தமிழக மீனவர்கள் 578-பேர்கள் கொல்லப்பட்டும் இலங்கையின் மீது  நட்புப்  பார்வையுடன் இருப்பதை கவனிக்க வேண்டும்!

          எனவே, தி.மு.க-வை சமாதானம் செய்யும் முயற்சியில் தொடர்ந்து ஈடுபடும்! கனிமொழி,தயாநிதி,அழகிரி,ராசா,தப்பிதங்கள்  மறைக்கப்படும், என்று ஆசை வார்த்தைகளை சொல்லி,மீண்டும் ஆதரவு  தருவதாக கருணாநிதியைச் சொல்லவைக்க  முயற்சிகள் மேற்கொள்ளவார்கள்!

      கருணாநிதி  ஏற்றுக்கொள்ளவில்லை  என்றால்,தொடர்ந்து ஈழபிரசனைக்கு  முக்கியத்துவம்  தரும்  முடிவில் இருந்தால், மதிய அரசு  வேறுவழி இன்றி, அதிகம் பயன்தராத அமெரிகாவின்  தீர்மானத்தை ஆதரித்து  வாக்களிக்க செய்யும்!  மறுபுறம்  கனிமொழி,ராசா ,அழகிரி, தயாநிதி, ஆகியோர்களின்  முறைகேடுகள் மீது  கடுமையான நடவடிக்கை எடுக்கும்  வேலைகளை  செய்யும்!

       ஆட்சி கவிழ்ந்துவிடக் கூடாது என்ற எண்ணத்தில், ஆதரவு  அளித்துவரும்,  லாலு பிரசாத் யாதவ்,முலாயம் சிங் யாதவ்,மாயாவதி, போன்றவர்களை தேர்தல்வரை  கூடுதல் கவனத்துடன் நடந்துகொண்டு, அவைகள் வாயால் இட்ட கோரிக்கைகளை  தலையால் செய்யும்! 

           தி.மு.க.மத்திய  அரசுக்கு அளித்த  ஆதரவை வாபஸ் வாங்கியது உண்மை தானா? இல்லை இதுவும் ஒரு அரசியல் பேரத்தின் வகையா? என்பது  சில நாட்களில் தெரிந்துவிடும்!   மதிய அரசுக்கு கருணாநிதி மீண்டும் ஆதரவு அளிப்பாரே ஆனால், அதற்க்கு காரணம்  அவரது குடும்பத்தவர்களின்   விருப்பமும் அவர்களின் எதிர்கால  நலனும் என்று  உறுதியாக சொல்லலாம் !

         அவ்வாறு மீண்டும் நடந்தால்,தமிழர்களை விட,தமிழர்களின் நலத்தை விட, இனப்படுகொலைக்கு  நியாயம் கேட்பதை விட,ஒட்டு மொத்த தமிழர்களின் உணர்வினைவிட, முக்கியமானது தனது வாரிசுகளின் நலம் என்பதை  கருணாநிதி சொல்லாமல் புரிய வைக்கிறார் என்றுதான் பொருளாகும்! அப்படி நடந்தால், வரலாறு ஒரு போதும்  கருணாநிதியை  மன்னிக்காது!


Friday, 15 March 2013

நீங்க என்ன நினைகிறீர்கள்?

        மகாத்மா காந்தி அவர்கள், உடுத்த வேறு ஆடை இன்றி,தான் கட்டியிருந்த சேலையின் ஒருபகுதியை உடலில் சுற்றிக்கொண்டு,மறுபகுதியை துவைத்துக் கொண்டிருந்த பெண்மணியைப் பார்த்து கலங்கி,அன்றிலிருந்து அரை ஆடையுடன் காட்சியளித்தார்!

      தனது தாயின் வேண்டுகோளை விதிமுறைகளுக்கு எதிராக இருந்ததால் தண்ணீர் குழாயைப் போட மறுத்து நிராகரித்தார் காமராஜர்!

         சாதாரணவகுப்பில்  ரயில் பயணத்தை செய்தும் காசை சிக்கனப்படுத்தி, அறிவுகண்ணைத் திறக்க மலிவு விலையில் புத்தகங்களை அச்சடித்து விநியோகித்தார் தந்தை பெரியார்!

       கட்சிப்பணம் ஆயிரக்கணக்கில் இருந்தும்,அதனை பயன்படுத்தாமல்,அந்த பணத்தில் தேநீர் வங்கிக் குடிக்கவும் விரும்பாமல் பட்டினி கிடந்தார் தோழர் ஜீவா!

        பொது வாழ்கையில்,சமூக நலத்தில் அக்கறைகொண்டவர்கள்  அன்று நடந்துகாட்டிய செய்கைகள் இவைகள்! இந்தியா சுதந்திரம் அடைந்து எவ்வளவோ ஆண்டுகள் கடந்துவிட்டது! இன்றும் நமது நாடு  அடிப்படை தேவைகளில் கூட தன்னிறைவு அடைய இயலவில்லை! சுதந்திர இந்தியாவில் இன்றும் நாற்பது சதவிகிதத்தினர்  வறுமையில் வாடுகிறார்கள்! அடிப்படை உரிமைக்காக போராடிக்கொண்டு இருக்கும் அவலம் தொடர்கிறது!    
      எல்லாவற்றுக்கும் காரணம்  பொதுநல நோக்கம் எனபது அரசியலில் இருந்து  மாறிவிட்டதுதான்! அரசியல் என்பது குறுகிய காலத்தில் அதிக லாபம் தரும்  வியாபாரமாக இன்றைக்கு பலரும் கருத்வதுதான்! இப்படி கருதும் நிலை  ஏற்பட்ட பிறகு,ஜனநாயகத்தின் உன்னதப் பண்புகள்,ஜனநாயகத்தின்  மாண்புகள்  கேலிக்குரியதாக ஆகிவிட்டது!

      ஒரு தேசிய இனமான தமிழினத்தின் மீது நடந்த தாக்குதலாக, அந்த இனத்தை  அளிக்கச் செய்த கொடூர நிகழ்வாக  கருதாமல் இன்றுவரை தமிழினம்  போராடிக் கொண்டு இருக்கிறது! பல்லாயிரக்கணக்கான மாணவர்கள்  நடந்துவிட்ட கொடுமைகளுக்கு நியாயம் கேட்டு,தன எழுச்சியாக போராட்டம் நடத்துகிறார்கள்! ஐ.நா சபையில் அமெரிக்க கொண்டு வரும் தீர்மானத்தை ஆதரிக்க இந்திய அரசு தயங்கி வருகிறது.! பாசிச ராஜபட்சேவுக்கு பக்கபலமாக செயல்பட்டு வருகிறது!

         இரோம் சர்மிளா அவர்கள் உண்ணாவிரதப் போராட்டம் நடத்தினால்,அவர் மீது தற்கொலை  முயற்சி என்று வழக்கு போட்டு பயமுறுத்துகிறது ! இப்படி செய்வது  எந்தவித ஜனநாயகம்  என்று தெரியவில்லை!  காந்தியடிகள் நடத்திய அறபோராட்டத்தை  ஆங்கிலேயர்கள் மதித்தார்கள்! காந்தியால் சுதந்திரம் பெற்ற காந்தியவாதிகள்  மதிக்கவில்லை!   அவமதித்து வருகிறார்கள்!

           இதிலிருந்து தெரிவது என்னவென்றால் ,இந்தியாவில் இனி அகிம்சையான,  சாத்வீகமான,அமைதியான போராட்டங்களால்  எந்தவித பயனும் ஏற்படப்போவதில்லை  என்பதுதான்!

         குமுறிக்கொண்டு இருக்கும் இளைய சமூகத்தை,அகிம்சைவதிகளை, அவர்கள் நடத்து அற போராட்டங்களை  அரசு  மதிக்காமல் நடந்து   கொள்வது நல்லதல்ல!  காந்திய வழி போராட்டங்களால்  பயன் இல்லை என்று இளைய தலைமுறையினர்கருதி, நேதாஜி  சுபாஷ் சந்திர போஸ் வழியில் போராட இறங்குவதற்கு முன்பு இதனை ஆட்சியாளர்கள்  புரிந்து கொள்ளவேண்டும்!

        இல்லையென்றால்," காந்தி தேசம் "என்றும்  "அகிம்சைவழியில் நாம் சுதந்திரம் பெற்றோம் "என்று சொல்வதும் அர்த்தமற்றதாகிவிடும்!

        காந்திய கொள்கைகளை  வலியுதுவதாக சொல்லும் ஆட்சியாளர்கள் தங்களது கொள்கைகளை கைவிடுவது அவர்களுக்கும் நல்லதல்ல! தேசத்திற்கும் நல்லதல்ல!! முதலில் அதனை புரிந்துகொள்ள வேண்டுவது களத்தின் தேவையாகும்!
   
        " நம் நாட்டு மக்கள் மிக நல்லவர்கள்! கோவணத்தை( இழந்தவனை) விட்டவனை கல்லால் அடிப்பார்கள் கொள்கையை விட்டவனை மந்திரியாக ஆக்குவார்கள் "என்று கண்ணதாசன் சொல்வார்!

        கொள்கைகளை இழந்து மந்திரியாக இருப்பவர்கள் மீது மக்களுக்கு  எப்போது  கோபம் வருமோ? அப்போதுதான் ஜனநாயகம்  தழைக்கும் என்று எண்ணுகிறேன்! நீங்க என்ன நினைகிறீர்கள்?


Friday, 8 March 2013

கைக்கு வரும் சோதனைகள்!

         காங்கிரசைப் பொறுத்த வரையில்  அக்கட்சி  நம்பி இருந்த  ராகுல் காந்தி  நான் பிரதமர் ஆக விரும்பவில்லை என்று கூறி இருக்கிறார்! எதிர்வரும் தேர்தலில் காங்கிரஸ் வெற்றிபெற வாய்ப்பில்லை என்று தெரிந்து  சொன்னாரோ,என்னவோ?  ராகுல் காந்தி  பிரதமர் ஆவது இருக்கட்டும்,அவர் சார்ந்துள்ள காங்கிரஸ் கட்சி வரும்  தேர்தலில் அதிக இடங்களை வெல்லுமா? என்பதே சந்தேகம்!

        காரணம்,  காங்கிரஸ் கட்சி  எல்லா மாநிலங்களிலும் அதிருப்தியை பெற்று இருக்கிறது! ஏழைகள்,நடுத்தர வர்கத்தினர், தொழிலாளர்கள், வணிகர்கள், போன்ற அனைத்து தரப்பினரிடமும் காங்கிரசுக்கு அதிருப்தி  இருக்கிறது! இது தவிர, அக்கட்சியின் மீது சுமத்தப்படும்,2ஜி முறைகேடு,சுரங்க ஒதுக்கீட்டு பிரசனை, ஹெலிகாப்ட்டர் வாங்குவதில் நடந்ததாகச் சொல்லப்படும் முறைகேடு,விவசாயிகளுக்கு ஒதுக்கிய நிதி குறித்த தணிக்கைத் துறையின் சமீப அறிக்கை, மக்களை வாடிவரும் விளைவாசிபிரசனையில் அக்கறை இன்றி இருப்பது, அடிக்கடி உயர்த்தப்படும் பெட்ரோல்,டீசல் உயர்வு, அதனால் ஏற்படும் சரக்குக் கட்டண உயர்வு,ஆகியவைகள் காங்கிரஸ் மீது கடும் அதிருப்தியை பொதுமக்களிடம் ஏற்படுத்தி இருப்பதை காணமுடிகிறது!

      காங்கிரஸ் கட்சியை வடமாநில மக்களும்,வாக்காளர்களும் வெறுக்கத் தொடங்கிய போதும் கை கொடுத்து  காப்பாற்றி வந்தது  தென் இந்திய மாநிலங்கள்தான்!    இப்போது தென் இந்திய மாநிலங்களின் பிரசனைகளை சரியாக கையாளாதது, மாநிலங்களுக்குள் ஏற்படும் தாவாக்களை  தீர்க்க முன்வராமல்,அரசியல் நோக்கத்துடன் நடந்துகொண்டது போன்ற காரணங்களால் காங்கிரசை கைகழுவ  தென்னிந்திய மாநிலங்களும் தயாராக உள்ளன!

           காங்கிரஸ்  ஆட்சி செய்யும் ஆந்திராவில் தெலுங்கான பிரசனை தீர்க்க முடியாத பிரச்னையாக இருக்கிறது,! ஜகன் ரெட்டி,சந்திரபாபு நாயுடு, சந்திரசேகர் ராவ் ஆகியோர்களை வரும் தேர்தலில் காங்கிரசு எப்படி சமாளிக்கும் என தெரியவில்லை!

     கர்நாடகாவிலும் இதே நிலைதான்.!  கர்நாடகாவில் எடியுரப்பா, பா.ஜ.க-வின் செயல்பாடுகளால் ஏற்பட்டு இருந்த பொது மக்களின் அதிருப்தி காங்கிரசுக்கு சாதகமாக இருந்தது!  அந்த  நிலையை, காவிரி விவகாரத்தைக் "கை"யாண்ட முறையால் வீணடித்து விட்டது!
   
       கேரளாவில் கம்யுனிஸ்டுகளின் குடைசல், பி.ஜே. குரியனின்  சூரிய நெல்லியின் கற்பழிப்பு விவகாரம்,மக்கள்  ஜனநாயகக் கட்சியின் தலைவர் நாசர் மதனியை  சிறையில் வைத்திருப்பது போன்ற விவகாரங்களால் காங்கிரஸ் கை வலுவின்றி உள்ளது!

    தமிழகத்தில் சொல்லவே வேண்டாம்! அகில இந்திய அண்ணா திராவிட முன்னேற்றக் கழகம், காங்கிரசோடு கூட்டு வைக்க வைப்பு இல்லை! கூட்டணியில் இருக்கும் தி.மு.கா-வும்  இலங்கைப் பிரச்சனையை வைத்து குடைச்சல் கொடுத்து வருகிறது. விடுதலை சிறுத்தைகள் கட்சி வரும் தேர்தலில் ஆதரவு கொடுக்கும் நிலை எடுக்காது எனத் தெரிகிறது! இலங்கை தமிழர்கள் விசயத்தில் காங்கிரஸ் அரசு நடந்துகொண்ட முறையால் ஒட்டுமொத்த தமிழர்களும்,தமிழின அமைப்புகளும் இருந்துவருவதால், தமிழகத்தைப் பொருத்தவரையில் காங்கிரசுடன் கூட்டு வைக்கும் எந்த கட்சியும் பாராளுமன்ற தேர்தலில் வெற்றி பெறுவது கடினமாகவே இருக்கும்!

     காங்கிரஸ் கட்சிக்கு  இருக்கும் வாக்கு வங்கி  சிறுபான்மையினரின் கணிசமான வாக்குகள்தான்! இதற்கு காரணம் அக்கட்சி அணிந்து இருக்கும்,தேர்தல் களங்களில் சிறுபான்மையினரைக் கவர சொல்லிவரும்
" மதச் சார்பற்ற  கட்சி" என்ற காங்கிரசின் முகமூடி!   சிறுபான்மையின வாக்காளர்கள் ஆன,முஸ்லிம்கள்,கிருத்தவர்களின் ஆதரவு முந்தைய தேர்தலில் கிடைத்த  அளவுக்கு எதிர்வரும் தேர்தலில் காங்கிரசுக்கு கிடைக்கவும்  வாய்ப்பு இல்லை!  முஸ்லிம்களுக்கு தனி இட ஒதுக்கீடு தருவதாக தேர்தல் சமயத்தில் காங்கிரஸ் சொல்லும் உறுதிமொழியை அக்கட்சி தேர்தல் முடிந்ததும் கண்டுகொள்ளாது என்பதை முஸ்லிம்கள் உணரத் தொடங்கி விட்டனர்!
   மிகபெரிய மாநிலமான உத்தரபிரதேசத்தில்  முலயாம் சிங்  யாதவ்,சென்ற தேர்தலில் முஸ்லிம்களுக்கு  கணிசமான சட்டமன்ற உறுபினர்களை வெற்றிபெற செய்து  முஸ்லிம் வாக்கு வங்கியை கணிசமாக கைப்பற்றி உள்ளார்! முலயாம்  கட்சியை சமாளிக்கவேண்டிய சங்கடத்துடன்,காங்கிரசுக்கு பிரதமர் கனவில்  இருக்கும் மாயாவதியின் கட்சியையும் சமாளிக்க வேண்டிய நிலை  இருக்கிறது!

மேற்கு வங்கத்தில்  மம்தா பானர்ஜியை சமாளிக்க வேண்டி உள்ளது! குஜராத்தில் நரேந்திர மோடியை கவனிக்க வேண்டியுள்ளது!

      இப்படி காங்கிரசின் நிலை பல மாநிலங்களில் படுமோசமாக  இருக்கிறது! இதனை உணர்ந்திருக்கிற தலைவர்கள் பலரும்  சூழ்நிலையை பயன்படுத்திக் கொள்ள இப்போது இருந்தே காய் நகர்த்த தொடக்கி உள்ளனர்!  

தடி எடுத்தவன் எல்லாம் தண்டல் காரன் என்பதுபோல ஆகிவிட்டது  இந்திய பிரதமர் பதவி! எப்போது வரும் என்று சொல்லமுடியாத நிலையில் தேர்தல் உள்ள நிலையில் அடுத்தப் பிரதமர் யார் என்பதாக ஆளாளுக்கு அடித்துக்கொள்ளும் நிலை ஏற்பட்டு இருக்கிறது!

        பா.ஜ.க-வைப் பொறுத்த வரையில் அதுவானியின் அந்தரங்கக் கனவு நிறைவேறாது என்று தெரிகிறது! மோடியை இன்றுவரை பிரதம வேட்பாளராக அத்வானி போன்றவர்கள் ஏற்காத நிலையில்,  பா.ஜ.க-வின் பிரதம வேட்பாளராக நரேந்திர  மோடியும் போட்டியில் இருக்கிறார்! சொந்த கட்சியில் சூனியம் வைகாமல் இருந்தால் மோடி பிரதமர் ஆகும் வாய்ப்பு உள்ளதை மறுக்க முடியாது!

Wednesday, 6 March 2013

பார்க்கத் தவறிய நாடகங்கள்!


       இந்திய அரசுக்கு மிக சிக்கலை இலங்கைக்கு எதிரான ஐ.நா. தீர்மானம் ஏற்படுத்தி இருக்கிறது! ஈழத்தமிழர்களை ராஜபட்சே  அரசு கொன்றுவிட்டதாக, இனபடுகொலை செய்து விட்டதாக கூறப்படும் குற்றசாட்டில் முழு உண்மை இல்லை! இந்தியாவின் விருப்பத்தின் படியே,இந்தியாவின் உதவியுடன் நடத்தப்பட்ட "தமிழினப் படுகொலை" அது!

      அப்படி இருக்கும்போது,குற்றவாளியிடமே நியாயம் கேட்பது போல ,இந்தியாவிடம் நியாயத்தை எதிர்பார்ப்பது வீண் வேலையாகும்! இலங்கை கூட்டாளியைக் கட்டிகொடுத்தால், கூட்டாளி தன்னையும் கட்டிகொடுத்து விடுவான் என்பது தெரிந்தே இந்தியா மௌன நாடகம் நடத்துகிறது!

      இந்திய அரசில் அங்கம் வகிக்கும் தி.மு.க-விற்கு  இது தெரியும்! எனவேதான், "கண் கேட்டபின்பு சூரிய நமஸ்காரம் "செய்வதுபோல, ஈழதமிழர்கள் நலத்தில் அக்கறை உள்ளதாக கட்டிக்கொண்டு,டெசோ நாடகத்தை நடத்துகிறது!

      படுகொலை நடந்தபோது பார்த்துகொண்டு இருந்துவிட்ட குற்றத்தை மறைக்கவும், தன்மீது வேறு யாரும் குற்றம் சுமத்தக் கூடாது என்ற எண்ணத்திலும் டெசோவைத் தூக்கிப் பிடித்து இருக்கும் தி.மு.வுக்கு.....  தமிழர்களின் நலனுக்கான தீர்மானத்தை ஆதரிக்க இந்திய அரசை வற்புறுத்துவது  இரண்டாம் பட்சம்தான்!

    தனது மகள் கனிமொழி, ஆ.ராசா, ஆகியோர்கள் மீது படிந்திருக்கும் ஊழல் குற்றச்சாட்டுகளில்  இருந்து வெளிவர, இந்திய அரசை நிர்பந்திக்கும் மறைமுக தந்திரமாகவும்,அழகிரி தொடர்புடைய சிக்கல்களை தீர்த்துக்கொள்ள  உதவும் ஆயுதமாகவும் டெசோ கவசம் தி.மு.க-வுக்கு பயன்படுகிறது!

       மேலும் எதிர்வரும் பாரளுமன்டத்  தேர்தலில் சீட்டு பேரத்துக்கும், தமிழர்களுக்கு தன்மீதுள்ள வெறுப்பை  போக்கும் நோக்கத்திலும் இப்போது காங்கிரசுக்கு எதிராக கச்சை கட்டுவது  போல நடந்துகொள்கிறது!

     தனது ஆட்சி காலத்தில் தமிழர்களின் நலனைப்பற்றி கருணாநிதி கவலைப்படுவதை விட,  தனது மக்களின் நலனைப்பற்றி கவலைபடுவதே அதிகம் என்பது எல்லோரும் அறிந்த உண்மையாகும்!இப்போது  அவர்படும் கவலையும்  அதுவாகவே இருக்கிறது! தமிழர்களின் கவலையோ,கண்ணீரோ இந்த தமிழ் தலைவருக்கு அப்புறம்தான் நினைவுக்கு வரும்!

        இந்தியாவில் ஈழத்தமிழர்களின் படுகொலை குறித்த விமர்சனங்கள் நடந்துவரும்  சூழலில் சர்வ வல்லமைபொருந்திய  சுபிரமணி சாமி  இலங்கைக்குச் சென்று  ராஜப்ட்சேவை சந்தித்து திரும்பி இருகிறார்! அவர் ராஜபட்சேவுக்கு  ஆறுதல் சொல்லப் போனாரா? இந்திய அனுசரணையாக இருப்பதைக் கூறப்போனாரா? அல்லது  ரஷியா,சீனா போன்ற நாடுகளின் வீடோ அதிகாரத்தைப் பயன்படுத்தி அமெரிகாவின் தீர்மானத்தை  ஒன்றுமில்லாமல் செய்துவிடலாம் என்று ஆலோசனை சொல்லப் போனாரா? இல்லை இந்த தீர்மானத்தை  அமெரிக்க கொண்டுவர   காரணமே  உலக நாடுகளின்  கண்டனத்துக்கு ஆளாகாமல் இலங்கையை காப்பாற்றத்தான் என்று  சொல்ல போனாரா? தெரியவில்லை! அந்த உண்மைகள் எல்லாம் அந்த  சுப்ரமணிய சுவாமிக்கே வெளிச்சம்!

    ஆனாலும் பாருங்கள் நம்ம சுப்ரமணிய சாமி  எதுக்கு இப்போ இலங்கைக்கு போயி ராஜபட்சேவைச் சந்தித்தீர்கள் என்று கேட்டதற்கு,"தமிழர்களுக்கு தனி மாநிலம் கேட்டு சந்தித்தேன்" என்று கூறியிருப்பது நல்ல நகைசுவை!   தனிநாடு கேட்டு  போராடிய தமிழர்களைக் கொன்றுவிட்டு, அக்கொலையை, இன அழிப்பை  பற்றிய தீர்மானம் வரும்போது,தமிழர்களுக்கு  தனிமாநிலம் கொடுக்க  சந்தித்தாராம்! அதற்கும் ராஜபட்சேவின் உதவி இருந்தால்தான் சாத்தியப்படும்  என்று கூறி, ராஜபட்சேவை நியாயவானாக காட்டி  இருக்கிறார், சு. சுவாமி !

     இந்த சு.சுவாமிதான் ராஜீவ் கொலைகாரர்களுக்கு  தூக்கு தண்டனையை உடனே  நிறைவேற்றவேண்டும் என்றும் சொல்லி இருகிறார்! தன்னை யாரும்  தூக்கில் போடமாட்டார்கள் என்ற தைரியத்தில் இவ்வாறு கூறிவருகிறார்! ராஜீவ்  கொலைகாரர்களை தூக்கில் போடவேண்டும் என்றால், இவரையும் சேர்த்துதான்  செய்யவேண்டும் என்பதை மறந்துவிட்டு பேசுகிறார்!

   "குரங்குகள் எல்லாம் கொலோசினால்,
   சாமிக்குக் கிட்டுமா சந்தனமாலை?
   குற்றவாளிகளே தீர்ப்புரை எழுதினால்,
    நிரபராதிகளுக்கு கிட்டுமா உண்மைநீதி?"

-- எல்லாம் தமிழர்களின் தலையெழுத்து!