Tuesday, 30 April 2013

ராமதாஸ்மீது தேசிய பாதுகாப்பு சட்டம் பாயுமா?

      வன்னியர்களுக்கு இடஒதுக்கீடு கோரி போராடிய மருத்துவர் ராமதாஸ் இன்று,வன்னியர்களை தனது கட்டுப்பாட்டில் வைத்துகொள்ளவும்,தனது அரசியல் எதிர்காலத்தை நினைத்தும்  சாதிய பாகுபாடுகளை வன்னியர்களிடம் பரப்பி  வருகிறார்!

       பெரியார்,அம்பேத்கார்  ஆகியோர்களைப் பற்றி,சமுக சீர்திருத்தம் பற்றி, வாய்கிழிய முன்பு பேசிய ராமதாசின்  கோர முகம்  சமீப கால நடத்தைகளால்  வெளிப்பட்டு வருகிறது!

       எந்த பெரியார்,அம்பேத்கரை பாராட்டி,அவர்களது சீர்திருத்தங்களை தொடர இருப்பதாக முன்பு கூறினாரோ,மேடைகளில் சவடால் விட்டாரோ, அதற்கு முரணாக, இன்று சாதியத்தை தூக்கி பிடிக்கும் நிலையில் அவர் செயல்பட்டு வருவது கவலை தருகிறது!

   " கத்தியை எடுத்தவன் கத்தியால் சாவான்" என்பது பழமொழி! . அதனை புரிந்துகொள்ளாத ராமதாஸ்  இன்று "சாதிய வன்முறை" என்ற ஆயுதத்தின் மூலம் தனது நோக்கங்களை நிறைவேற்றிக்கொள்ள முடிவு செய்து,அமைதியான தமிழகத்தை கலவர பூமியாக ஆக்கிவருவது தெரிகிறது!   தருமபுரி கலவரமும்,மரக்காணம் கலவரமும் அதனை உறுதிபடுத்துகின்றன!!

        இறையாண்மைக்கு எதிராக, இந்திய அரசியல் சட்டத்துக்கு முரணாக இன பேதத்தை,சாதிய வேற்றுமையை காட்டி,சமூகத்தில் அமைதிக்கு, பொதுமக்களின் வாழ்க்கைக்கு  குந்தகம் விளைவித்து வரும் ராமதாஸ் போன்றவர்களை தேசிய பாதுகாப்பு சட்டத்தில் கைது செய்யவேண்டும்! அல்லது நாடுகடத்த வேண்டும்! அவரது  செயல்களுக்கு துண்டுதலாகவும், பின்னணியாகவும்   இருக்கும் பாட்டாளி மக்கள் கட்சியை  தடைசெய்ய தேர்தல் கமிசன் முன்வர  வேண்டும்! செய்வார்களா?

  

Thursday, 25 April 2013

மாறாத மிருக மனத்தினர்...

         நமது அரசியல்வாதிகள் ஆட்சி நடத்தும் லட்சணத்தை அவகளது செயல்கள் மூலம் மட்டுமின்றி சொற்கள் மூலமும் தெரிந்துகொள்ள முடிகிறது!

        உத்திரபிரதேச மந்திரி ஒருவர், 'அவை அடக்கம் இன்றி', நாவடக்கம் இன்றி, பெண் ஆட்சிதலைவர் ஒருவரை அழகாக இருப்பதாக  மேடையில் பேசி கண்டனம் செய்யப்பட்டார்! பெண்ணின் கன்னங்களைபோல  பளபளப்பான சாலை அமைக்கபடுவதாக மீண்டும்  பேசி பதவியை இழந்தார்!

       அதே  உத்திர பிரதேச  மாநிலத்தில் ஜவுளித்துறை அமைச்சராக இருக்கும்,  "ஷிவ் குமார் பேரியா"   என்ற அமைச்சர்,  நான் சொன்னால்தான் காவல்துறையினர் உட்காருவார்கள் எனது பேச்சை கேட்காவிட்டால் 24-மணி நேரத்தில் அவரை வேலையை விட்டு தூக்கி விடுவேன், நான் 5 முறை எம்.எல்.ஏ  என்றெல்லாம் பேசி தனது அதிகாரத்தை,அதிகார மமதையை வெளிச்சம்போட்டு காட்டியிருக்கிறார்!

        ஏற்கனவே,காவல்துறையினர்  பொதுமக்களின் நலனுக்கு பணி செய்வதை விடுத்து,சட்டம் ஒழுங்கை காப்பதை விடுத்து, ஆட்சியாளர்களின்  விருப்பப்படி நடந்துவரும் நிலையில்,  இதுபோல அமைச்சர்களும் அதிகாரத்தில் உள்ளவர்களும் பேசுவதும் காவல்துறைக்கு பகிரங்க எச்சரிக்கை விடுவதும் ஆபத்தானது!

     அதாவது சட்டப்படி  எனது விருப்பம்  தவறாக இருந்தாலும், எனது விருப்பபடி காவல்துறை நடந்துகொள்ளவேண்டும் அதனை நிறைவேற்ற வேண்டும்  இல்லை என்றால் வேலையில்  இருந்து உன்னை தூக்கி விடுவேன்  என்று மிரட்டுவது, அவரது  எதேச்சாதிகார,சர்வாதிகார  மனோபாவத்தை காட்டுகிறது!

         ஜனநாயக ஆட்சி முறையில்,மக்களால் தேர்ந்தெடுக்கப்படும் ஆட்சியாளர்கள், ஜனநாயகத்துக்கு  எதிராக செயல்படுவதை இதுபோன்ற  பகிரங்கமான  பேச்சுகள்  தெரிவிகின்றன!

       மற்றொருஅமைச்சர் , உ.பி.யின் சமூக நலத்துறை அமைச்சர், 'ராம் மூர்த்தி வர்மா' என்பவர், காவல்துறைக்கு பரிந்து  பேசுவதாக எண்ணிக்கொண்டு, காவல்துறையின் செயல்பாடுகளை நியாயப்படுத்தி பேசியுள்ளார்.  "குற்றங்கள் முன்பும் நடந்தன,  இப்போதும் நடக்கின்றன,   இனியும் நடக்கும் " என்று பொறுப்பில்லாமல்  பேசுகிறார்!

           எப்போதும் குற்றங்கள் நடக்கும் என்றால், காவல்துறை எதற்கு? இவரைபோன்ற மந்திரிகள் எதற்கு?

           இதைவிட கொடுமையானது  மத்திய  பிரதேச மாநில காங்கிரஸ் தலைவர், "சத்தியேந்திர கட்டாரா "என்பவர் கூறி இருப்பதாகும்!

        " ஒரு பெண் தவறு செய்யும் நோக்கத்தில், ஆணைப் பார்ப்பதால்தான்     அவளை  ஆண் தொந்தரவு செய்கிறான் "என்று   ஒட்டுமொத்த பெண்களின் மீது  பழியை போட்டு,  ஆண்களை நல்லவர்களாக சித்தரிக்க முயன்று இருக்கிறார்!

          ஐந்து வயது சிறுமி,ஆறுவயது சிறுமிகள் எந்த நோக்கத்தில் ஆணைப் பார்த்தார்கள்? அவர்கள்  பாலியல் வல்லுறவுக்கு ஆளானார்கள்?

         சமூகத்தில் புரையோடிபோய் உள்ள வக்கிரங்களுக்கு என்ன காரணம் அதனை களைவது எப்படி என்பது குறித்து  சிந்திக்காமல், தான்தோன்றித் தனமாக  இதுபோல  கூறுபவர்களை  பார்க்கும்போது, இவர்களை எல்லாம்  மனிதர்களாக கூட நினைக்க முடியாது!  அனால் இவர்கள் எல்லாம் மிக முக்கிய பொறுப்புக்கு வந்துள்ளார்கள்!

        "நாயை குளிப்பாட்டி நடுவீட்டில் வைத்தாலும்  நக்குற புத்தி " உள்ள இந்த ஆசாமிகளை, மன வக்கிரம் உள்ள மிருகங்களை   என்ன செய்வது?


Tuesday, 23 April 2013

லால் பகதூர் சாஸ்திரியும்,மன்மோகன் சிங்கும்


        இந்திய பாராளுமன்றம் இன்று கலவர காடாக காட்சி தருகிறது! சுரங்க ஒதுக்கீடு,2ஜி அலைகற்றை  ஒதுக்கீடு,ஹெலிகாப்ட்டர் வாங்குவதில் முறைகேடு , டெல்லி சிறுமிகள் கற்பழிப்பு,சாக்கோவின் பாரபட்சமான அறிக்கை என்று எதையாவது ஒன்றை எடுத்துகொண்டு  தினமும் எதிர்கட்சிகள் ரகளை செய்கின்றனர்! என்ன நடந்தாலும்  சரி, தங்களை தற்காத்துக் கொள்வதிலும், தங்களது நிலையில்,நோக்கத்தில் எந்த மாற்றத்தையும் செய்வதில்லை என்ற நிலைபாட்டில்  மத்திய அரசும் ,மன்மோகன் சிங்கும்  இருப்பது தெரிகிறது!

        ஆக்கபூர்வமான விவாதங்கள் பாராளுமன்றத்தில் நடைபெறுவது இப்போது அருகிப் போய்விட்டது! கூச்சலும்,குழப்பமும்,பாராளுமன்ற ஒத்தி வைப்பும்  தொடர்கதைகளாக மாறிவிட்டன. மக்களின் பணம் இந்த விதமாகவும் விரையம் செய்யப்படுகிறது!  

       ஆனால், ஆட்சியாளர்கள் தங்களுக்கு வேண்டிய மக்கள் விரோத சட்ட திருத்தங்களை சந்தடி சாக்கில் நிறைவேற்றிக் கொள்ளவும், மக்களுக்கு ஆதரவான சட்ட  திருத்தங்களை கிடப்பில் போட மட்டும் தவறுவதில்லை! மகளிர் இட ஒதுக்கீடு மசோதா,லோக்பால்  சட்ட மசோதா ஆகியவைகள் இன்றுவரை  நிறைவேற்றாமல் உள்ளதையே உதாரணமாக சொல்லலாம்!

        நாடாளுமன்ற கூட்டு குழு விசாரணைக்கு ஆஜர் ஆகப்போவதில்லை என்று பிரதமர் எப்போது அறிவித்தாரோ, அப்போதே  ஜனநாயகம்  இந்தியாவில் தோல்வி அடைந்து விட்டது!  சீசரின் மனைவி சந்தேகத்துக்கு  அப்போற்பட்டவராக இருக்க வேண்டும் என்பார்கள்! நமது பிரதமர் அப்படி இல்லை என்பது  துரதிஷ்டம்!  மக்கள் அவர்மீது வைத்திருந்த   நம்பிக்கைக்கு  துரோகம் இழைத்து விட்டார்!

லால்பகதூர் சாத்திரி  குறித்து ஒரு சம்பவம் :

          லால் பகதூர் சாஸ்திரி  காங்கிரஸ் கட்சியின் முழு நேர  ஊழியராக  செயல்பட்டு வந்தார்! அவரது குடும்ப செலவுக்கு காங்கிரஸ் கட்சி மாதந்தோறும்  நாற்பது ரூபாய்கள் கொடுத்து வந்தது! அதில் அவர் குடும்பம் நடந்துவந்தது!

      ஒருமுறை அவரிடம் காங்கிரஸ் பிரமுகர் ஒருவர்,"அய்யா அவசரமாக நூறு ரூபாய்  பணம் தேவைபடுகிறது நீங்கள் உதவுங்கள் "என்று  கேட்டார். சாஸ்திரி,"  என்னிடம் அவ்வளவு பணம் ஏது ? கட்சி கொடுக்கும் நாற்பது ரூபாயில்  குடும்பத்தேவைகளை நிறைவேற்றி வருகிறேன்" என்று பதிலுரைத்தார்!

      இருவரும் பெசிகொண்டிருந்ததை கவனித்த சாஸ்திரியின் மனைவி, அவரைதனியே அழைத்து," எதோ அவசர தேவைக்கு கேட்கிறார். என்னிடம் நூறு  ரூபாய் இருக்கிறது அதனை அவரிடம் கொடுத்து அனுப்புங்கள்" என்று கூறி பணதைகொடுக்கவே , சாஸ்திரியும் பணம் கொடுத்து அனுப்பிவிட்டு  மனைவியிடம் ,"ஏது பணம்?" என்று விசாரித்தார்! அவரது மனைவி  "குடும்ப செலவுக்கு தரும் நாற்பது ரூபாயில்  ஐந்து ஐந்து ரூபாய்களை மிச்சம் பிடித்து சேர்த்ததாக "  தெரிவித்தார்!

      சாஸ்திரி மனைவியை பாராட்டிவிட்டு,காங்கிரஸ்  தலைமைக்கு  "அய்யா எனது குடும்ப செலவுக்காக கட்சி நாற்பது ரூபாய் கொடுத்துவருகிறது! இனிமேல் அதனை  முப்பத்தைந்து  ரூபாயாக குறைத்து கொடுங்கள் அதிலேயே எனது தேவைகளை நிறைவேற்றிக்கொள்ள முடியும்"  என்று   கடிதம் எழுதினார்!

      முன்னாள் பிரதமர் லால் பகதூர் சாஸ்திரியையும்  இந்நாள் பிரதமர் மன்மோகன் சிங்கையும்  நினைத்து பார்க்கவேண்டிஉள்ளது!   

                                    

Monday, 22 April 2013

நாடு எங்கே போகிறது?

         லால் பகதூர் சாஸ்திரி  ரயில்வே துறை அமைச்சராக  இருந்தபோது, தமிழகத்தில் அரியலூரில்  ரயில் விபத்து  நடந்தது!  பதறிப்போன லால் பகதூர் சாஸ்திரி தனது அமைச்சர் பதவியை ராஜினாமா செய்தார்! நடந்த விபத்துக்கு தார்மீகப் பொறுப்பு ஏற்று ராஜினாமா செய்வதாக அறிவித்தார்!

      பதவியில் உள்ளவர்கள்  தங்கள் பதவி காலத்தில்  தங்களது துறையில் ஏதேனும் தவறுகள் நடந்தால்,  தாங்களே தவறு  செய்ததாக அன்று கருதினர்! தங்களது பணிகளை அர்ப்பணிப்புடனும், மிகுந்த கவனத்துடனும் செய்தனர்! அன்றைய ஆட்சியாளர்களுக்கு, அரசு பணியாளர்களுக்கு தங்களது பதவியும் பணியும் பொது மக்களின் நலனுக்கு  சேவை செய்ய  கிடைத்த வாய்ப்பாக கருதி செயல்பட்டனர்!

        பொது வாழ்க்கையிலும், அரசு பணிகளிலும் எந்தஒரு தவறும் ஏற்படக்கூடாது என்பதில் அவர்களுக்கு அக்கறை இருந்தது. தவறு நேரிட்ட போது,நேரிட்ட தவறுக்கு தாங்கள் காரணம் இல்லை என்றாலும் தாங்களே தவறு இழைத்து விட்டதாக எண்ணி வருந்தினர்!

      ஆனால்  இன்று?  எத்தகைய தவறு,முறைகேடு ஏற்பட்டாலும் கூட, தாங்களே அறிந்து செய்திருந்தாலும் கூட அதனை ஏற்க மறுத்து வருகின்றனர்!   தங்களது தவறுகளை, குற்றங்களை  பிறரின் மீது சுமத்தி, தங்களை நிரபராதிகளாகவும் ,நீதிமான்களாகவும்  காட்ட முற்படுகின்றனர்!

         இந்திய அரசியலில் இத்தகைய மோசமான நடத்தை  ஆட்சியாளர்கள் இடம்  இருந்து  அரசு பணியாளர்கள் வரை ஊடுருவி உள்ளது, கவலை அளிக்கிறது! அதிர்ச்சி அளிக்கிறது!  தங்களது பொறுப்புக்களை தட்டிகழிக்கும் மனநிலை  உள்ள இது போன்றவர்களால் அனைத்து  துறைகளும் சீரழிக்கப்பட்டு  வருகிறது!
 
         பொறுப்புகளை தட்டிகழிக்கும் இதுபோன்ற ஆட்சியாளர்களால்,அரசு பணியாளர்களால் நாட்டின் வளர்ச்சி, பொருளாதாரம்,பாதிக்கப்பட்டு வருகிறது! ஊழலும் முறைகேடுகளும் அதிகரிகின்றன!  மக்களின் நலம் பின்னுக்கு தள்ளப்படுகிறது!  ஆகவே  இத்தகைய செயல்களை  ஆட்சியாளர்களும்  அனைத்து துறை பணியாளர்களும்  தவிக்க முற்பட வேண்டும்! சமூக ஆர்வலர்களும்,கல்வியாளர்களும் தடுக்க நடவடிக்கை  வேண்டியது அவசர  தேவையாகும்!

       டெல்லி போலீஸ் கமிசனர்," தனது பதவியை ராஜினாமா செய்துவிட்டால், பிரச்னை தீர்ந்து விடுமா?" என்று கேட்டு உள்ளார்.   தனது கடமையை அவர் சரியாக செய்யவில்லை  என்பதை இதன்மூலம் தெரிவித்து இருக்கிறார்! அவரது பதவி வெறியையும் அது தரும் வசதி வாய்ப்புகளையும் அவர் அதிகமாக விருப்புவதைக்  காட்டி இருக்கிறார்!

       இவர்களுக்கு எல்லாம்,  ஜனங்கள் என்ன ஆனாலும்,  எப்படி சீரழிந்தாலும், எவ்வளவு கஷ்டப்பட்டாலும்  கவலை இல்லை!  தங்களுக்கு அதுபற்றிய  அக்கறையோ,கவலையோ இல்லை என்ற மனநிலைதான் இருக்கிறது!

ஆட்சியாளர்களும் அப்படித்தான் இருகிறார்கள்! ஆட்சியாளர்கள் எப்படியோ,அது போலதானே அதிகாரிகளும் இருப்பார்கள்?




விவசாயமே நமது ஜீவநாடி

        இந்தியா  ஒரு விவசாய நாடு. இந்தியாவில் 70 சதவிகிதம் மக்களின் வேலைவாய்ப்பு விவசாயத்தை சார்ந்தே இருக்கிறது! நூற்றி இருபது கோடி மக்களின் உணவு, உடை போன்ற அடிப்படை தேவைகளை நிறைவேற்றவும், அவர்களின் பொருளாதார காரணியாகவும் உள்ளது விவசாயமே!

         துரதிஷ்ட்ட வசமாக இந்திய தலைவர்கள்,ஆட்சியாளர்கள் விவசாயத்திற்கு முக்கியம் கொடுத்து  திட்டங்களை நிறைவேற்றாமல் தொழில் துறை வளர்ச்சிக்கான திட்டங்களை நிறைவேற்ற முன்னுரிமை கொடுத்து கடந்த காலங்களில் செயல்பட்டு வந்ததால் இந்திய விவசாயம் நலிந்து விட்டது!

           விவசாயத்திற்கான அரசின் கவனிப்பு இல்லாததாலும்,நீர் தேவைகள் போன்ற பாசன வசதி கிட்டாததாலும், உரம், மருந்துகள், விதைகள், போன்றவற்றை வாங்கி, விவசாயம் செய்து, லாபம் கிடைக்காததாலும் விவசாயிகள் கடந்த காலங்களில்  லட்சக்கணக்கில் தற்கொலை செய்துள்ளனர்!

         இது ஒருபுறம் இருக்க,  'குதிரை கீழே தள்ளியதும் இல்லாமல் குழியும் பறிக்கும்' செயலாக  மதிய மாநில அரசுகள்  விவசாயிகளிடம் இருக்கும் நிலங்களை  எடுத்து, தொழிற்சாலைகள் கட்டவும் சாலைகள் அமைக்கவும் இன்ன பிற தேவைகளுக்கு  வழங்கவும் செய்துவருகிறது!

     விளைநிலங்களை அரசு  எடுக்கும்போது, அதற்கு நிவாரணமாக,இழப்பீடாக கொடுக்கும் பணம் மிகவும் குறைவாக  இருப்பதுடன் சமயங்களில்  இழப்பீடு வாங்குவதற்கு நிலத்தை பறிகொடுத்த விவசாயிகள் படும் கஷ்டம் சொல்லத் தரமற்றதாக இருக்கிறது!  

         இவ்வாறு பொதுமக்களிடம்,விவசாயிகளிடம் இருந்து எடுக்கப்பட்ட நிலங்களை தனியார்களின் தொழிற்சாலைகள் அமைக்க, பன்னாட்டு கம்பெனிகளின்  பெரும் தொழிலதிபர்களுக்கு  வழங்கும் அரசு,மேலும்  அவர்களுக்கு கோடிக்கணக்கில்  தொழிற்கடன் கொடுத்து,எற்றுமதி, இறக்குமதி சலுகைகள் கொடுத்து,சலுகை விலையில் தடங்கலில்லாத மின்சாரம் ,பிற தேவைகளை  நிறைவேற்றிக் கொடுத்து வருகிறது!

         இத்தனை சலுகைகளைப் பெற்று தொழில் தொடங்கும் பெரும்  முதலாளிகள்  'அரசுக்கு அல்வா  கொடுத்து' கொள்ளை லாபம் அடிகின்றனர்! தொழிற்சாலையில் பணிபுரியும் தொழிலாளர்களுக்கு போதிய ஊதியம் வழங்குவதில்லை!  போதிய வசதிகளை செய்வதில்லை!  

          நிரந்தர தொழிலாளர்களாக  சிலரை வைத்துகொண்டு  ஆயிரக்கணக்கில் தினக்கூலி  பணியாளர்களாக வைத்து அவர்களது உழைப்பையும்  சுரண்டி வருகின்றன! இவைகளை அறிந்து  இருந்தும், மதிய மாநில அரசுகள்  அத்தகைய தொழிற்சாலைகள்  மீது நடவடிக்கை எடுப்பதில்லை!  

        இது ஒருபுறம் இருக்க, விவசாய நிலங்களை அரசுகள் மூலம் பெற்ற தொழில் அதிபர்கள், தாங்கள்  பெற்ற நிலத்தில் பெரும்பகுதியை எந்தவித பயனும் இன்றி  தரிசாக வைத்தும், ஒன்றுக்கும் உதவாத செயல்களுக்கு பயன்படுத்தியும் வருவதையும்  காணமுடிகிறது!  

       இவைகளைத் தெரிந்தும் கூட.. இந்திய அரசு தொடர்ந்து தொழில் நிறுவனங்களுக்கு   நிலங்களை வழங்குவதற்கு முனைப்பு காட்டி வருகிறது!   விவசாயிகளிடம் இருக்கும் நிலங்களை  பறிப்பதற்கு முனைப்பு காட்டுகிறது! ஒட்டுமொத்த விவசாயிகளின் வாழ்வாதாரத்தைப்  பறித்து, அவர்களை நடுத்தெருவில்நிறுத்தும்  மதிய அரசின்  எண்ணத்தையே, தற்போது கொண்டுவரவிருக்கும் " நில எடுப்பு சட்ட மசோதா" வெளிப்படுத்துகிறது!

        நில எடுப்பு சட்ட மசோதாவிற்கு  மாநில அரசுகள் காட்டும் எதிர்ப்பு என்பது தங்களது அதிகார குறைப்பு  பற்றியதாக உள்ளதே தவிர, விவசாயிகளின் எதிர்காலம்  குறித்த கவலையாக இல்லை என்பதை பார்க்க முடிகிறது!

             சுற்று சூழலை மாசுபடுத்தி, இந்திய விவசாயிகளின் எதிர்காலத்தை கேள்விக்குறியாக்கும் தொழில் நிறுவனங்கள் எத்தனை வந்தாலும்  இந்தியா தொழில் சார்ந்த நாடாக  முடியாது ! விவசாயமும் அது சார்ந்த தொழில்களுமே  இந்தியாவை வளர்ச்சியடைய செய்யும், வேலைவாய்ப்புகளை உருவாக்கும், வேலை  இல்லா  பிரச்சனையையும்  தீர்க்கும்  என்பதை  எல்லோரும் புரிந்துகொள்ள வேண்டும்!



Friday, 19 April 2013

பயிரை மேயும் வேலிகள் !

        சட்டத்தின் முன்பு அனைவரும்சமம்  என்று பேசப்படுகிறது!  ஆனால், நடைமுறையில்  சட்டத்தின் பயன்கள்  அனைவருக்கும் சமமாக கிடைப்பதில்லை!

        வசதிபடைத்த, பணக்காரகளுக்கும்,பெரிய தொழில் அதிபர்களுக்கும் சட்டம் மட்டுமல்ல,ஆட்சி அதிகாரத்தில் உள்ளவர்களும்,ஆள்பவர்களும் கூட கைகட்டி சேவகம் செய்யும் நிலைதான் நடைமுறை எதார்த்தமாக உள்ளது!

         ஏழைகளுக்கு  எப்போதும் நீதி மறுக்கப்பட்டு வரும் நியதியே, இந்திய நீதியாக இருப்பது வேதனையாகும்!

        சாமானிய மக்கள் தங்களது அடிப்படை உரிமைகளுக்காக போராடும்போது கூட , அவர்களது நியாயங்களும், கோரிக்கைகளும்  ஏற்கப்படுவதில்லை! மாறாக,  அவ்வாறு உரிமைகேட்டு, நீதி கேட்டு  போராடும் சாமானிய மக்களை காவல்துறையும்,ராணுவம்   போன்ற அரசு அமைப்புகள் மூலம் அடக்கி,ஒடுக்கவும்,அவர்களை மிரட்டி பயமுறுத்துவது  நடக்கிறது!

         உத்திரபிரதேச மாநிலத்தின் அலிகார் நகரில் வியாழன் அன்று காணமல் போன  தனது மகள் குறித்து போலீசிடம் முறையிட்டும்  நடவடிக்கை இல்லை என்பதால் ,   கண்டித்து போராடிய பெற்றோர்களையும்,அவர்களது உறவினர்களையும்  கண்மூடித்தனமாக போலீசார் தாக்கி உள்ளனர்!

     காணமல் போன  சிறுமி பாலியல் கொடுமைக்கு ஆளாக்கப்பட்டு, கொல்லப்பட்டு உள்ளார்!  குப்பைகளுக்கு நடுவில்அவளது உடல்  வீசி எறியப்பட்டு,பிறகு  கண்டெடுக்கப்பட்டு உள்ளது!

       சாமானிய மக்களின்  உயிர்களை குப்பைக்கு சமமாக மதிக்கும் சமூக அவலங்கள் நடந்து வருகின்றன!  இத்தகைய  கொடுமைகளுக்கு  எதிராக செயல்படவேண்டிய  காவல்துறை,  சிறுமியின்  பெற்றோர்களை மிருகத்தனமாக தாக்கி உள்ளனர்! காவல்துறை சமூக கொடுமைகளை களைவதை விட்டுவிட்டு,பதிக்கப்படும் சாமானிய மக்களை   மிரட்டுகிறது !

      பொதுவாக  போலீசார்,  சட்டம் ஒழுங்கை காப்பதையும், சாமானிய மக்களின் பாதுகாப்புக்கு உத்திரவாதம்  தருவதையும் விட்டுவிட்டு, ஆள்பவர்களின்  ஏவல் நாய்களாகவும், உயர் அதிகாரிகளின் விருப்பத்திற்கு ஏற்ப  ஊளையிடும்  நரிகளாகவும்  நடந்துகொள்ள தொடங்கிவிட்டனர்! போலீஸ் என்ற துறையின்  பொறுப்பும் கடமையும்,நோக்கமும் சிதைந்து விட்டது!

       சமூக சீர்கேடுகளுக்கும், குற்றங்களுக்கும்,போலீசார்  காரணமாகி வருகின்றனர்! குற்றங்களை தடுக்கவேண்டிய போலீசார் , குற்றங்களுக்கு  உடந்தையாகவும், குற்றவாளிகளை காப்பாற்றவும்,குற்றவாளிகளுக்கு   ஆதரவாகவும் செயல்படும் அவலம் தொடர்ந்து  நடந்து வருகிறது!

      உத்திர பிரதேசத்தில் இப்போது நடந்துள்ளது  சமீபத்து உதாரணம்! குஜராத் கலவரம், போலி என்கவுண்டர்கள், வாச்சாத்தி கொடூரங்கள், மதுரை  பத்மினி,தளி கல்பனா போன்ற கற்பழிப்பு கொடூரங்கள் என்று ஆயிரகணக்கான  கொடும் செயலுக்கு  போலீசார்  காரணமாக இருகின்றனர்! வெளியே பயிரை மேய்ந்தால்  விவசாயி போவதெங்கே?

       போலீசாரின்  இத்தகைய முறைகேடுகளை தடுக்க ஆட்சியாளர்கள்  யாரும் முன்வருவதில்லை!  பொது மக்களின்மீது  அக்கறை கொண்ட அனைவரும் சிந்திக்க வேண்டியுள்ளது!


Thursday, 18 April 2013

எதை நாம் விரும்புகிறோமோ, அது கிடைக்கும்!

        
           கடந்த 15.04.2013-யில்  அமெரிகாவின் பாஸ்டன் நகரத்தில்  குண்டு வெடிப்பு நடந்தது! அமெரிக்கவே பதறியது!   மன்மோஹன்சிங் அவர்கள் கடும் கண்டனம்  தெரிவித்தார்!  இப்போது  டெக்சாஸ் அருகில் இருக்கும் நகர் ஒன்றில்  உரத் தொழிற்சாலையிலே வெடிவிபத்து என்று செய்தி வருகிறது!
 
           கடந்த ஒருவருடமாக  பாகிஸ்தானில்  இருபதுக்கு  மேற்பட்ட குண்டுவெடிப்புகள் நிகழ்ந்து,ஆயிரகணக்கான அப்பாவி மக்கள் பலியாகினர்!

             ஈராக்கில் அமெரிக்க படை ஆக்கிரமிப்புக்கு பிறகு அந்நாட்டில்  ஏராளமான குண்டுவெடிப்புகள் நடந்து,உயிர் இழப்புகள்  நடந்துள்ளன!

           இப்போது வடகொரியாவின் மீது குண்டுமழை பொழிய,  அமெரிக்க காரணம் தேடிக்கொண்டு இருக்கிறது!

        பாலஸ்தீனத்தில்,  காஸா  பகுதியில்  இஸ்ரேல் ராணுவத்தால் வீசப்படும் குண்டுகள்  எண்ணற்றவையாகும்!

        இந்தியாவில் நடைபெறும் குண்டு வெடிப்புகளுக்கு அளவே இல்லை! உயர்நீதிமன்றத்தில்,பாராளுமன்றத்தில், பொதுமக்கள் கூடும் மார்க்கெட் பகுதியில்,கோவில்களில்,கடைவீதிகளில்,மசூதிகளில், என்று ஏராளமான குண்டுவெடிப்புகள் நடைபெற்று வருகிறது!

        இப்போது இந்திய தொழில் நகரமான  பெங்களூரில்  குண்டு வெடிப்பு நடந்துள்ளது!

        குண்டு வெடிப்புகளுக்கு பல காரணங்களும்,பல நோக்கங்களும் இடத்துக்கு இடம்,நாட்டுக்கு  நாடு  வேறுபடுகிறது!

          குண்டுவெடிப்புகள் அரசியல்  காரணங்களுக்காக,அரசியல்  ஆதாயங்களுக்காக,  எதிரிகளை பழி வாங்குவதற்காக,  செய்யபடுகின்றன!

         ஆனால், இவற்றின் பின்னணியில்  மனிதர்களின் கொடூர மனமும், அம்மனங்களில்  இருந்துவரும் மிருக வெறியும்  கண்டிக்கத்தக்கவை! தண்டிக்கத்தக்கவைகள்!!

 உலகத்தில் அமைதியான,அன்பான,மனித நேயம் உள்ள இடம் என்று எதுவும் இல்லையோ ?  என்று எண்ணத்தோன்றுகிறது!

        "நெஞ்சு பொறுப்பதில்லை இந்த நிலை கெட்ட மனிதர்களை நினைத்து விட்டால்" என்று பாரதியைப் போலவே குண்டுவெடிப்பினை  செய்யும் மனிதர்களை,  நாட்டினை, இயக்கங்களைப் பார்த்து  வேதனைப்பட  வேண்டியுள்ளது!

         இன்று உலகத்தில் அமைதி அழிந்து,   எங்கெங்கு பார்த்தாலும் அவலம்,கலகம்  என்று காட்சி அளிக்கிறது!! மனிதர்களிடத்தில்   ஆண்டவா.. காப்பாற்று  எனும்  அபயக்குரல்கள் எழும்புகிறது! 
  
      ஒன்று மட்டும் உண்மையாக  தெரிகிறது! " கத்தியை  எடுத்தவன் கத்தியால் சாவான்" என்பதுபோல வெடிகுண்டு, தீவிரவாதம் போன்றவற்றில் ஈடுபடும் எந்த மனிதனும், சமூகமும்,நாடும், அவர்கள் விதைக்கும்   தீவிரவாதத்துக்கு  பலியாக  நேரிடும் என்ற உண்மை  தெரிகிறது!

       தீவிரவாதத்தை  விரும்பினால்,  அதுவே விரும்பும் மனிதனுக்கும், சமூகத்திற்கும்,  நாட்டிற்கும்    கிடைக்கும்   என்பதுதான்  நடைபெறும்  இதுபோன்ற சம்பவங்கள் நமக்கு சொல்லும் படிப்பினையாக இருக்கிறது!



Tuesday, 16 April 2013

எல்லைகள்: நண்பர்கள்!

எல்லைகள்: நண்பர்கள்!:        மாவீரன் நெப்போலியனை பற்றி,ஒரு செய்தியை சொல்வார்கள். கவனம் சிதறாதவர்  என்றும் மிக கண்டிப்பானவர் என்றும் சொல்வதை கேட்டு இருக்கிறேன்! ...

நண்பர்கள்!

       மாவீரன் நெப்போலியனை பற்றி,ஒரு செய்தியை சொல்வார்கள். கவனம் சிதறாதவர்  என்றும் மிக கண்டிப்பானவர் என்றும் சொல்வதை கேட்டு இருக்கிறேன்!

       ஒரு சமயம் நெப்போலியனை பயமுறுத்த,அவரது நண்பர்கள் ஒரு வெடி குண்டை வெடிக்குமாறு ஏற்பாடு செய்துவிட்டு அவருடன் பேசிக்கொண்டு இருந்தார்களாம் ,வெடிகுண்டு வெடித்தபோது, அதனை ஏற்பாடு செய்த நண்பர்களே,அதிர்ச்சி அடிந்து தங்கள் கையில் இருந்த மது கோப்பையை தவறவிட்ட போதும்,நெப்போலியன் ஆடாமல் அசையாமல் அதிர்ச்சி அடையாமல்  இருந்தாராம்!

      உண்மையோ,பொய்யோ, இதுவல்ல விஷயம்!  எனது நண்பர்களில் பலரும் கூட  "நெப்போலியனை "போல   எதற்குமே  உணர்ச்சிவசப்படாத, எதைபற்றியும் கவலைபடாத, எதனாலும் பாதிக்கபடாத  உள்ளத்தினராய் இருகிறார்கள்!

    விலைவாசி உயர்வா? அது அப்படிதான் இருக்கும்! தெருவெல்லாம் குழி தோண்டி இருகிறார்களா, அதெல்லாம் சகஜம்,கண்டுக்கக் கூடாது! ரோடிலே அடிபட்டு கிடக்கிறானா?  எவனோ அடிபட்டு கிடந்தால், நமக்கு என்ன? நாம் பத்திரமாக  இருக்கிறோம்!  என்பதுபோல, அனைத்து  பிரச்சனைகளிலும்   தங்களுக்கு  எந்த சம்பந்தமும் இல்லை என்பதுபோல  நடந்து கொள்ளுவதில் சமர்த்தர்கள்!

     இவர்கள் அன்றாடப் பிரச்சனையில் மட்டும் இப்படி இருப்பவர்கள் இல்லை! வோட்டு போடுவது, தேசிய,மாநில அளவில் பதிப்புகளை ஏற்படுத்தும் அரசியல் ,தேர்தல்,மக்களின் உரிமைப் போராட்டம், பந்த், போன்ற எதையும்  கண்டுகொள்ளாத , சீரியசாக  நினைக்காத  மனநிலையில் இருந்துவருவதைக் கண்டு எனக்கு  வியப்பு ஏற்படும்!

        இவர்களை  உலகத்தில் இருந்து விலகி தனித்த ஒரு உலகத்தில்  வாழும் அதிசய பிறவிகள்  என்று நினைப்பேன்!

         ஆனால், அவர்கள்  ரேசன்கடையில்,சினிமா தியேட்டரில்,பஜார் கடைகளில் ,பேருந்து நிறுத்தத்தில், பொது இடங்களில்   தங்களை முன்னிலைபடுத்தி, நியாங்களை,தர்மங்களை பற்றி பேசுவதை கேட்கும்போது மட்டும் வெறுப்புப் ஏற்படும!

   ஆடுகளை, மாடுகளைப் போல  வாழ்ந்து, பிறகு இறக்கும்  இவர்களை பார்க்கும்போது,  பரிதாபம் ஏற்படும்!       அவர்கள், மனிதர்கள் இல்லை மந்தைகள்  என்று  நினைக்கத் தோன்றுகிறது!

  எனது நண்பர்களிடம் இன்னுமொரு குணமும் இருக்கிறது,  நமது மனம் நோகுமே என்று  நினைத்து...  நம் முன்பு நம்மைப்பற்றி பேசாமல், நாம் போனபிறகு நம்மைப்பற்றி  பிறரிடம் பேசுவார்கள்! அவ்வளவு நல்ல குணம் கொண்ட நண்பர்கள்!
 

Monday, 15 April 2013

டாக்டர்.அம்பேத்கர் தலித்துகள் தலைவரா?

        டாக்டர் அம்பேத்கரின் 122-வது பிறந்த தினமும் சித்திரை முதல் நாளும் இந்த ஆண்டு ஒன்றாக வந்தது சிறப்பு! தமிழர்கள் அனைவரும் இந்த இரண்டு நிகழ்சிகளையும் சேர்ந்தே கொண்டாடி மகிழ்ந்தனர்!

     மத்திய அரசு, அம்பேத்கரின் பிறந்தநாளுக்கு அரசியல் சட்டத்தை வடிவமைத்த சிற்பி,சட்டமேதை அண்ணல் அம்பேத்கரின் பிறந்த நாள் விளம்பரங்களை நாளிதழில் கொடுத்து இருந்தது!

        தமிழக அரசின் செய்தி விளம்பரத் துறை சார்பிலும் அம்பேத்கர் பிறந்த நாள் விளம்பரங்களை நாளிதழில் கொடுத்து இருந்தார்கள்!!    தமிழக அரசு கொடுத்த நாளிதழ் விளம்பரத்தில்  அம்பேத்கரின் பெருமையை,அருமையை சீர்குலைக்கும் வகையில் அம்பேத்கரை "தலித் சமுதாயத்தின்  தலைவராக "  காட்டி விளம்பரம் கொடுக்கப்பட்டு இருந்தது  முரண்பாடும்,நெருடலும் ஆகும்!

          சமீபத்தில்   இந்தியா வந்த அமெரிக்க அதிபர்," பராக் ஒபாமா,"இந்திய நாடாளுமன்றத்தில்  பேசும்போதுமூன்று இந்திய தலைவர்களைக் குறிப்பிட்டு  பாராட்டி பேசி இருந்தார்!

        இந்திய சுதந்திர போராட்டத்தை  அஹிம்சை வழியில்  நடத்தி, வெற்றி கண்ட தேச தந்தை காந்தி அடிகளைபற்றியும், இந்து சமயத்தின் புரட்சிகர கருத்துகளை,ஒபாமா- வின் ஊரான சிகாகோ நகரத்தில் வெளிபடுத்திய சுவாமி விவேகானந்தரையும் புகழ்ந்து குறிப்பிட்ட பராக் ஒபமா அவர்கள், அண்ணல் அம்பேத்கரை பற்றி மூன்றாவதாக  தான் மதிக்கும்  இந்திய தலைவர்களில் ஒருவராக குறிப்பிட்டு  இந்திய நாடாளும் அவையில் பேசினார்!

      " எந்த சமூகத்தினால் தான் பிறந்த,சார்ந்த, தலித் சமூகம்  பாதிக்கப்பட்டதோ,   அந்தசமூகத்தின்  ஆதரவுடன், அந்த சமூகத்தின் சமூக நலத்துக்காகவும், இந்திய அரசியல் சட்டத்தை   எழுதிய, சட்ட மேதை  டாக்டர்.அம்பேத்கர் என்று ஒபாமா பாராட்டி, தான் மதிக்கும் இந்திய தலைவர்களில் அம்பேத்கரும்  ஒருவர் என்று குறிபிட்டார்!

        இப்படி உலகம் போற்றும் தலைவராகவும்,ஒடுக்கப்பட்ட,தாழ்த்தப்பட்ட சமூகத்தின் உரிமைக்கு  குரல் கொடுத்தவராகவும் விளங்கிய  அம்பேத்கர் அவர்கள், இந்தியாவின்  அனைத்து சமூகத்திற்கும்  தலைவர் என்பதை மறைக்கவும், மறக்கவும் செய்யும் கயமைத்தனமாக  அவரை சாதியதலைவராக சிலர் காட்டிவருகின்றனர்!

        சாதியத்தை வீழ்த்த அவர் போராடியதை,  பொறுத்துக் கொள்ள  இயலாத உயர்சாதி ஆதிக்கதினரின் ஆதங்கமும், கசப்பு உணர்வும்  அம்பேத்கர் குறித்த தமிழக அரசின் நாளிதழ் விளம்பரம் மூலம்  தெரிகிறது!

       ஒரு உண்மையைச் சொல்லவேண்டும்! காந்தி இறக்கும்போது அவரிடம்  பணம் இல்லை!  அண்ணல் இன்று காந்தி இல்லாவிட்டால் அது பணமே இல்லை!  அதைப்போல, அம்பேத்கரை நினைக்காமல், இந்திய அரசியலை இனிமேல்  எந்த அரசியல் கட்சியும், தலைவர்களும் செய்யவே முடியாது என்பதும் உண்மையாகும்!




Friday, 5 April 2013

ஏழைகள் பற்றிய அக்கறை!

          நமது  அரசியல்வாதிகளுக்கும்,ஆளுவோர்களுக்கும்  ஏழைகள் மீது கவனமும்,கரிசனமும்  வரும்  என்றால்... தேர்தல்  நெருக்கத்தில் தான் ஏழைகள் மீது  அக்கறை வருகிறது!

          தேர்தல் முடிந்தவுடன் ஏழைகளைப் பற்றியோ,அவர்களது கஷ்டங்களைப் பற்றியோ,  ஏறெடுத்தும் பார்ப்பதில்லை!

           இந்த பொதுவான விதிக்கு ராகுல் காந்தியும் விதிவிலக்கு இல்லை! உத்திரபிரதேசத்தில் சட்டமன்ற தேர்தல் நடைபெறுவதற்கு முன்பு, திடீரென்று சமூகத்தில் அடித்தட்டு மக்களாக இருக்கும் சாமானிய,ஏழைகள்  வசிக்கும் பகுதிக்கு விஜயம் செய்து, அவகளின் வீட்டில் இருக்கும் உணவை சாப்பிட்டும், அவைகள் பயன் படுத்திய கட்டிலில் படுத்தும்,குசலம் விசாரித்தும்  தன்னை ஒரு ஏழைப் பங்காளனாக,அவர்களின் வாழ்கையை,ஏழ்மையை புரிந்துகொண்டவரா ராகுல்காந்தி காட்டிக் கொண்டார்!

        இந்த ஊடகங்கள் அப்போது ராகுலை போட்டிபோட்டு  பாராட்டியும், விளம்பரம் செய்தும் ஏழைகள் மீது ராகுலுக்கு இருக்கும் அக்கறையை வெளிச்சமிட்டன!  தேர்தல் முடிந்து, காங்கிரஸ் உத்தரபிரதேசத்தில் தோல்வியடைந்தது!  அகிலேஷ் யாதவ்  முதல்வராக அறுதிப் பெரும்பான்மையுடன் ஆட்சி அமைதததும்  ராகுலுக்கு  ஏழைகள் மீது இருந்த அக்கறையை  காணவில்லை!  உ.பி.-க்கு அப்புறம் ராகுல் சென்று எந்த ஏழையின் வீட்டிலும் தங்கவில்லை,நலம் விசாரிக்கவில்லை!  உணவும் உண்டதாக  செய்தும் இல்லை!

         இப்படிப்பட்ட ராகுல்காந்தி,   இப்போது  திடீரென்று  ஏழைகளைப் பற்றியும், நூறு கொடிமக்களைப் பற்றியும, அவர்களது ஒத்துழைப்பை கொண்டுதான்  தேவைகளை நிறைவேற்ற முடியும் அதற்க்கு அரசினால் மட்டுமே  முடியாது  தொழில் அதிபர்களான நீங்களும் உதவ வேண்டும் என்று  தொழில் அதிபர்கள்  நிகழ்ச்சியிலே  பேசியுள்ளார்!  
   
      இதுமட்டுமின்றி,சிறுபான்மை மக்களின் நலம்,முன்னேற்றம், தாழ்த்தப்பட்ட  மக்களின்  நலம் அவர்களது மேம்பாட்டை பற்றியெல்லாம்  கவலைப்பட்டு பேசியிருக்கிறார்!

      ஏதோ,சராசரி அரசியல்வாதி போல ராகுல் பேசியதற்கு  பி.ஜே.பி-கட்சி கண்டனம் தெரிவித்து இருக்கிறது!  உண்மையிலேயே ராகுல்  சிறுபான்மையினர், தாழ்த்தப்பட்டவர்கள் நலத்துக்காக பரிந்து பேசவில்லை என்பது  தெரிந்தும், தேர்தல் நெருங்கிவிட்ட நிலையில் காங்கிரசுக்கு இவர்களின் வாக்குகளை  பெற வேண்டிய தேவை இருப்பதாலும்  ஒப்புக்கு பேசிய  ராகுலின் பேச்சை, பி.ஜே.பி-கட்சி  சீரியசாக எடுத்துக் கொண்டு கண்டனம் செய்துள்ளது!

       இப்போதும் மத்தியில் காங்கிரஸ் கட்சிதான் ஆட்சி செய்கிறது என்பது ராகுலுக்கோ,  பி.ஜே.பி-கோ தெரியாததல்ல!  ஏழைகளுக்கு மேலும் கஷ்டத்தைக் கொடுக்கும் என்று தெரிந்திருந்தும்,  நினைத்த போது  எல்லாம் பெட்ரோல்,டீசல் விலையை  காங்கிரஸ் அரசு  உயர்த்தியதும், சரக்கு கட்டணம்,பால்,பஸ் கட்டணம்,  காய்கறிகள், உணவுப்பொருட்கள் அனைத்தும் உயர்ந்து தங்க முடியாத  சுமையில்  எல்லோரும் அழுந்திக் கிடப்பதும் தெரியாதது அல்ல!

           குடிக்க தண்ணீர் இல்லாமல் மக்கள் பரிதவிப்பதும், விவசாயிகள் கடன் தொல்லையால்  தற்கொலை செய்து கொள்வதும், நெசவாளர்கள், தொழிலாளர்கள்  மின்சாரம் இல்லாமல்  முடங்கிக் கிடப்பதும்,வறுமையில் வாடுவதும் ராகுலுக்கும்  பி.ஜே.பி-க்கும்  தெரியாதது  அல்ல!

        ஏழைகளைப் பற்றி, அவர்களது   நல்வாழ்வுக்கு,மேம்பாட்டுக்கு உருப்படியாக எதையும் செய்யாத இவர்கள், ஏழைகளைப் பற்றி நீலிகண்ணீர் வடிப்பது    எதிர் வரும் தேர்தலை  மனதில் நினைத்துதான் என்பது உள்ளங்கை நெல்லிக்கனியான உண்மையாகும்!

         சிறுபான்மையினருக்கு  இட ஒதுக்கீடு  தருவதாக காங்கிரஸ் தேர்தல் வாக்குறுதி தந்து பத்து ஆண்டுகளுக்கு மேலாகிறது! அதைப்பற்றி கவலைப் படவில்லை.!

       வரும் தேர்தலிலும் இதுபோலவே  சிறுபான்மையினருக்கும், தாழ்த்தபட்ட சமூகத்தினருக்கும்  வீடு,சாப்பாடு, உடை  எல்லாம் தருவதாக காங்கிரஸ் கட்சியும், பாரதிய ஜனதா கட்சியும்  தேர்தல் வாக்குறுதிகளை தரும் என்று ஏழைகள் எதிர்பார்க்கலாம் ! 

          "யோக்கியன் வருகிறான் சொம்பை எடுத்து வீட்டுக்குள்ளே வை"  என்கிற கதைதான்  ஏழைகள் பற்றிய இவர்களின் பேச்சும், செயலும்!



Thursday, 4 April 2013

வாங்க சிரிக்கலாம்!

       முலாயம் சிங் யாதவ் மத்திய புலனாய்வுத் துறை C B I- அய்யை  கடுமையாக சாடி இருக்கிறார்! சி.பி.ஐ  அமைப்பை காங்கிரஸ் கட்சி அரசியல் காரணங்களுக்காக பயன்படுத்துகிறது, காங்கிரஸ் அல்லாத கட்சிகளையும், அதன் தலைவர்களையும் மிரட்டவும்,காரியம் சாதிக்கவும் பயன்படுத்துகிறது. காங்கிரசின் ஆயிரங்கைகளில்  சி.பி.ஐ  போன்ற அமைப்புகளும் ஒன்று என்று கடுமையாக கூறி இருக்கிறார்!

         முலாயம் சிங் இவ்வாறு கூறியிருப்பது உண்மையன்பதை  சி.பி.ஐ-இன் பல செயல்கள் உறுதி செய்கின்றன ! சி.பி.ஐ  காங்கிரசுக்கு மட்டுமல்ல, காங்கிரஸ் அல்லாத அரசுகள்  மத்தியில் ஆட்சி செய்தபோதும் கூட  அது ஆளும் கட்சிகளின் ஏவல்களுக்கு,விருப்பத்துக்கு ஏற்றார்போல  செயல்பட்டு வந்துள்ளது!
 

         சி. பி. ஐ-ஒன்றும்  தன்னிசையான செயல்பாட்டை கொண்டுள்ள அமைப்பு அல்ல!  இதற்கு  கடந்த கால  இந்திய அரசியலில் ஏராளமான உதாரணங்கள் உள்ளன!

        காங்கிரசின் விருப்பத்துக்கு ஏற்ப சுனில்த எம் .பி-யின் மகன் பிரபலமான நடிகர் என்பதற்காக,  மும்பை குண்டு வெடிப்பு வழக்கில் தொடர்புடைய சஞ்சய் தத்துக்கு சி.பி.ஐ சலுகை காட்டிஉள்ளது!

       அரசியல் காரணங்களுக்காக அத்வானி போன்றவர்களின்  வழக்குகளை உடனடியாக அப்பீல் செய்யாமல் காலம் தாழ்த்தி, இப்போது தேர்தல்  நேரத்தில்  பி.ஜே.பி-கட்சிக்கு நெருக்கடி கொடுக்கவும்,தேர்தல்  பிரசாரத்துக்கு பயன்படுத்திக்கொள்ளவும்  அப்பீல் செய்துவருகிறது!

       தி.மு.க- கட்சியின் பொருளாளரும்,தலைவருமான  ஸ்டாலின்  வீட்டுக்கு  காங்கிரசுக்கு கொடுத்துவந்த  ஆதரவை விளக்கிக் கொண்ட அடுத்த நாளே  சோதனை இட்டது  போன்றவைகள்  சி.பி.ஐ-இன் பாரபட்சமான, காங்கிரசின் விருப்பத்திற்கு ஏற்ப செயல்பட்டு வருவதைக் காட்டும் சமீபத்திய உதாரணங்கள் ஆகும்.

      2ஜி-  ஸ்பெக்ட்ரம் வழக்கில்  இப்போது வேகம் காடும் சி.பி.ஐ, மும்பை அடுக்குமாடி குடியிருப்பு ஊழல், காமன்வெல்த் விளையாட்டு ஊழல்களில் சுணக்கம்  காட்டி வருவதை  கவனத்தில் கொள்ளவேண்டி இருகிறது! அந்த ஊழல்கள் எல்லாம் காங்கிரஸ் கட்சியின் முக்கிய தலைவர்கள் தொடர்புடைய ஊழல்கள்  என்பதால்தான் சி.பி.ஐ -மெத்தனமாக செயல்படுகிறது என்ற குற்றச்சாட்டுகளில்  உண்மை இருக்கிறது!

       கடந்த காலத்தில்  ஆயுதபேர  ஊழலை  சி.பி.ஐ கையாண்டது. அப்போது, பேருக்கு சில அதிகாரிகளை  விசாரித்த சி.பி.ஐ , ராஜீவ் காந்தியை விசாரிக்கவே இல்லை! ராணுவ தளபதி சுந்தர்ஜி சில ரகசியங்களை வெளியிட்டதும், வேறு உளவுவழக்கை விசாரிக்கப் போய்  சி.பி.ஐ  அவரை மிரட்டியது!

      செக் நாட்டில் கைத்துப்பாக்கிகள்  வாங்கியதில் ஊழல் செய்ததாக,      அருண் நேரு மீது புகார் கூறி,  சி.பி.ஐ  விசாரித்து ,  ஆதாரம் இல்லை என்று பிறகு பின்வாங்கியது!

        தொல்லை கொடுக்கும் விதமாக நூஸ்லி வாடியாவின் குடியுரிமை விவகாரத்தை கிளறி கைது  செய்தது! அதில் வெற்றி பெறமுடியாமல் சி.பி.ஐ தோல்வி  அடைந்தது!

     வி.பி.சிங்கின் உறவினரும்  அமேதி தொகுதி ராஜாவுமான  சஞ்சய் சிங்கை பூப்பந்தாட்ட வீரர்,  சையது மோடியின் கொலைவழக்கில் சி.பி.ஐ விசாரித்து, சையது மோடியின் மனைவி அமீதாவுக்கும் அவருக்கும் இடையிலான கள்ள உறவை அம்பலப்படுத்தி பிரசாரம் செய்தது! ஜனதா ஆட்சியில் அவ்வழக்கை தொடர்ந்து நடத்தாமல் இழுத்தடித்தது! சந்திர சேகரோடு, சஞ்சைசிங் கட்சி மாறி ஆட்சி அமைத்தபோது,  வழக்கை  கிடப்பில்  போட்டது!

      ராஜீவ் கொலை விசாரணை என பலகோடி ரூபாக்களை செலவிட்ட சி.பி.ஐ  1984-யில் இந்திர கொலையைத்தொடர்ந்து 5000-க்கும் மேற்ப்பட்ட சீக்கியர்கள் டெல்லியில்  கொல்லப்பட்ட வழக்கை  முடக்கி வைத்திருந்தது!  காரணம் சீக்கியர்களைக் கொன்றவர்கள் காங்கிரசு மந்திரிகள்,எம்.பிக்கள்,ராஜீவின் எடுபிடிகளாக  இருந்தவர்கள் என்பதால்தான்!

      பாம்பே டையிங் அதிபர்,  நூஸ்லி வாடியாவை அம்பானியின் ஆட்கள் கொள்வதற்கு முயன்ற சதிவழக்கை கைப்பற்றிய சி.பி.ஐ , கொலைகாரகளை தப்பிக்க செய்யும் வகையில், வழக்கை  முடக்கியது!

     அம்பானியின் ரிலையன்ஸ் கம்பனியின் அந்நிய செலவாணி பங்குச் சந்தை மோசடி வழக்குகளை புலனாய்வு செய்ய எடுத்துக்கொண்டு, உண்மையில் அவற்றை முடக்கவும், மூடி மறைக்கவும் சி.பி.ஐ வேலை செய்தது

         ராஜீவ்வின் கூட்டாளி சத்தீஷ் சர்மா செய்த சர்க்கரை இறக்குமதி ஊழல் மற்றொரு கூட்டாளியான சம்பிட்ரோடா செய்த தொலைபேசி ஒப்பந்த (சி -டாட்)மோசடியை இதேபோல மூடிமறைக்க வேலை செய்தது!

      வி.பி.சிங் மகனுக்கு வெளிநாட்டில் கள்ளப்பணம் இருப்பதாக சந்திரசாமி கும்பல் மூலம் போர்ஜரி ,போலி ஆவணங்கள் தயாரித்து, ராஜீவ் அரசு  அவதூறு செய்தது! அப்போதைய வெளியுறவு மந்திரியாக இருந்த நரசிம்மராவ் ,இதற்கு உடந்தையாக இருந்தார் என்பது கண்டுபிடிக்கப்பட்டது ! அதனால், சந்திர சேகர்,  நரசிம்மராவ்  ஆட்சிகள் ஏற்பட்டபிறகு இந்த வழக்கையும் சி.பி.ஐ கிடப்பில் போட்டு விட்டது!  

     இப்படி எத்தனையோ  ஆதாரங்களை, முன் உதாரணங்களை  மத்திய புலனாய்வு துறையான,   சி.பி.ஐ.யின்  செயல்களுக்கு,  பாரபட்சங்களுக்கு,அரசியல் ஆதாயத்துக்கு அந்த அமைப்பு பயன்பட்டு வருவதையும்,பயன்படுத்தப்பட்டு வருவதற்கும்  காட்டலாம்!

     முலாயம் சிங் யாதவ்  இப்போது கூறியிருப்பது அவருக்கு காங்கிரஸ் அரசு கொடுக்கும் நிர்பந்தத்தால்  என்பதுதானே தவிர உண்மையாகும்!

      "தொழில் திறன்","பாரபட்சம் இல்லாத நடுவு நிலைமை" 
"நேர்மைக்கு விசுவாசம் "   இவைகள் எல்லாம் என்ன தெரியுமா? சி.பி.ஐ-யின் இலட்சினையாக  பொறிக்கப்பட்டுள்ள முத்திரை வாசகங்கள் தான்!
 
       சிரிப்பு வருதா? சிரிக்காதீங்க!  அப்புறம் உங்கள் மேலும் சி.பி.ஐ-க்கு கொபம் வந்தாலும்  வரும்!









  

Wednesday, 3 April 2013

நமக்கு சொல்லும் பாடங்கள்!

             தனக்கு  துன்பம் விளைவிக்காத, தன்னை எதிர்க்காத வாலியை,     ராமன் மறைந்து இருந்து  அம்பு எய்து  கொன்றான்.!  தனக்கு துன்பம் விளைவித்தவன்,தனது மனைவியை கானகத்தில் இருந்து கடத்திச் சென்று துன்புறுத்திய ராவணனை... ராமன்  நேரடியாக  எதிர்த்து போர் தொடுக்கிறான்!

           வாலியை மறைந்து இருந்து கொன்றது ராமனின்  தவறு,  அவனது புகழுக்கு இழுக்கு என்று வாதிப்பவர்கள் உண்டு! ராமன்  தன்னிடம் அடைகலம் அடைந்த சுக்ரீவனுக்கு  உதவ  வாலியைக் கொன்றது சரி என்று வாதிப்பவர்கள் இருகிறார்கள்!

          இராவணன் தனது படைகளை இழந்து,தேர்,கோடி,வில்,வாள் போன்ற ஆயுதங்களை இழந்து, நிராயுதபாணியாக  போர்களத்தில்  நின்றபோது, அவனைக் கொல்லாமல்,  "இன்று போய் நாளை வா" என்று வழியனுப்பி வைத்ததாக கூறுகிறார்கள்! அப்படி பகைவனுக்கும் அருளும் நன்னெஞ்சம் கொண்டிருந்த  ராமன்,  வாலியை...  அதுவும் அவனை எதிக்காத நிலையில், சுக்ரீவனுடன்  சண்டையிடுவதில் கவனத்தை செலுத்தி இருந்த நேரத்தில், மறைந்து இருந்து வாலியை  கொன்றது ஏன்? என்ற நெருடல்   எப்போதும் இருந்து வரும் நெருடலாகும்!

          இந்த முரண்பாட்டுக்கு  இப்போதுதான்  ஒருவாறு  எனக்கு பொருள் புரிகிறது!  ராமாயணம்  உண்மையாக நடந்தது இல்லை! அது ஒரு கற்பனைக் கதை  என்ற விவாதங்களை  தள்ளிவைத்துவிட்டு ஆராய்ந்தால், இந்த வாலியின் வதம்  ஒரு  முரண்பாடு  என்பது புரியும்!

          இத்தகைய முரண்பாடுகள் இதிகாசம் என்று சொல்லப்படும்  ராமாயணத்திலும்  மகாபாரத்திலும் அநேகம் உள்ளன! ஆனாலும் ராமாயணத்தையும்  மகாபாரத்தையும் இன்றுவரை  ராமனின் அவதாரக் கதையாகவும்,ராமனின்  பெருமையைக் கூறவும் பலரும்,குறிப்பாக பிராமணர்கள்,வைணவர்கள்  சொல்லிவருகின்றனர்! "இப்படிதான் நடந்தது"  என்பதற்கு  பொருள்தான்  "இதிகாசம் " என்று ஒருபுறம் கூறிக்கொண்டே  இவ்விரு கதைகளையும் தங்கள்  விருப்பத்திற்கு ஏற்றமாதிரி  வெட்டியும் ஒட்டியும்  திரித்தும், சேர்த்தும் இன்று  ராமாயணமும் மகாபாரதமும் தொடர்ந்து  சொல்லப்பட்டு வருகின்றது! படக்கதைகளாக, தொலைக்காட்சி மூலமாக, பத்திரிகைகள்,இதழ்கள் வாயிலாக  இக்கதைகள் பரப்பப்பட்டு  வருவதற்கு  பல காரணங்கள் உள்ளன!

         இந்துமதம் தனது  கட்டமைப்பை  இழந்து வருவதும்,தனது பகுத்தறிவுக்கு ஒவ்வாத  மூட நம்பிக்கைகளை விட்டுவிட்டு, கல்விபயின்ற  இளைய தலைமுறையினரை  திருப்தி படுத்த வேண்டியது இந்துமதவாதிகளுக்கு  அவசியமாக உள்ளது!

          இந்துக்கள்  என்று வகைப்படுத்தப்பட்ட பிராமணர்கள், உயர்சாதி இந்துகளைத் தவிர,  மற்ற இந்துமக்கள்  மதம் மாறுவதை தவிர்க்க இத்தகைய கதைகள் உதவும்  என்பதும் ஒரு காரணமாகும்!

         இந்துமதப் பெருமைகளாக  இவைகளைக்கூறி, இந்துக்கள் அல்லாத சிறுபான்மை  மக்களை  வெறுக்கவும்,அவர்களுக்கு எதிராக செயல்படவும் இந்துமக்களை அணிதிரட்ட வும்   திரிக்கப்பட்ட  ராமாயணமும்,மகாபாரதமும் இந்து மதவாதிகளுக்கு உதவுகிறது!

        இவைகளைத்தவிர  இவ்விரு கதைகளை தொடர்ந்து சொல்லுவதன் மூலம்  இவைகளே உன்னதமானவை, இவைகளைத்தவிர  தமிழில் சிறந்த இலக்கியங்கள்,புதினங்கள் இல்லை என்ற மாயையை  ஏற்படுத்தி, தமிழ் இலக்கியங்களும்,அறநூல்களும் இருட்டடிப்பு  செய்யவும்  பயன்படுகின்றன!

       தமிழ் இனத்துக்கு எதிரான, தமிழ் இலக்கியங்களுக்கு எதிரான, தமிழர்களின்  நாகரீகம், பண்பாட்டுக்கு எதிரான  சித்தரிப்புகளை தொடர்ந்து செய்து,   தமிழ் மொழியை,அதன் சிறப்பை, தமிழின்   வரலாற்றை அழிக்கும் முயற்சியாக  இவ்விரு கதைகளும்  தொடர்ந்து பரப்பப்பட்டு வருகின்றன!

        இவைகளை தவிர,   இவ்விரு கதைகளை  தொடர்ந்து பிராமணர்களும் அவர்களது  ஆதரவு பத்திரிக்கைகளும்,ஊடகங்களும் பரப்புவதற்கு முக்கியமான காரணம் உள்ளது!

       ராமாயணமும், மகாபாரதமும்  பிராமணர்களின் ஆதிக்கத்தை தொடர்ந்து இந்தியாவில் நீடிக்கவும், தக்கவைக்கவும் உதவும் செயல் திட்டங்கள் அவை என்பதாகும்!

       வலிமையான எதிரியை, என்னமாற்றல்,செயல் என ...ஒருமுகப்பட்ட, திறமை உள்ளவனை   "வாலியை  ராமன் மறைந்து இருந்து கொன்றதைப் போல"  நடந்துகொண்டு   ஒழிக்கவேண்டும்.  ராவணனைப்போல  பற்று உள்ளவனை,ஆசாபாசம்  உள்ளவனை,தனது எண்ணம்,செயல்,ஆற்றல் ஆகியவைகளை ஒருமுகப்படுதாமல்  உள்ளவர்களை  நேரடியாக  மோதி வெற்றிகொள்ளலாம்  என்பதுபோன்ற  அறிவுரைகள் இதிகாசத்தில்  இருப்பதுதான்!

        தமிழின வெறுப்பில் இருந்த இந்திய ஆட்சியாளர்கள்,  வாலியைக் கொன்றதைபோல  "தங்களை மறைத்துக்கொண்டு", இலங்கைத்  தமிழர்களை கொன்று குவிக்க காரணமாக இருந்தார்கள்! இனியும் அவ்வாறே செயல்படுவார்கள்  என்பதுதான்  ராமாயண வாலி நமக்கு சொல்லும் படிப்பினையாகும்!